प्रदेश मांय होळी री धूम-धाम सरू व्हे ग्यी है । गुरूवार ने होळी मंगळायी जावेला, जद के आगला दिन चौदह मार्च ने रंग खेल र धुलंडी मणायी जावेला। होळी रे मौके मिन्दरां मांय खास झांकियां सजाई ज्यी है अर केई दिनां ऊं फागोत्सव रो सिलसिलो चाल रह्यो है। न्यारी-न्यारी ठौड़ां मिठाइयां सागे रंग, अबीर अर गुलाल री दुकानां मण्ड्योड़ी है अर भांत-भांत री पिचकारियां बच्चां रो ध्यान खींच रही है। म्हाणा कोटा खबरनवीस बतायो के वठे होळी मंगलावण सारू ज़रूरी तैयारियां करी जा रही है। आज केई स्कूल-कॉलेजां मांय होळी खेली ज्यी। होळी रा त्यौहार ने ध्यान राखता थकां हिफ़ाज़त रा खास इंतजाम करी ज्या है। राजधानी जयपुर मांय अभय कमांड सेंटर ऊं पूरा शहर री निगरानी राख्यी जावेला। इंर् सागे पुलिस वाळा ई लगातार राउंड लगावेला अर ड्रोन कैमरां रे जरिये निजर राख्यी जावेला। होळी रा त्यौहार रे मौके खाद्य विभाग री टीमां मुस्तैदी सागे खाण-पीण री चीजां मांय मिलावट करण वाळां रे खिलाफ़ कार्रवाई कर रही है। पाली ज़िला रा सुमेरपुर अर सोजत मांय आज साढे चार हजार लीटर मिलावटी घी अर तेल ज़ब्त करी ज्यो। राज्यपाल हरिभाऊ बागड़े रंगां रा त्यौहार होळी अर धुलण्डी री बधाई दीनी है। वां रा शुभकामना संदेश मांय श्री बागड़े कह्यो के होळी रंगां रे जरिये उमंग अर उमाव रो दरसाव करण सागे आपसी मेल-जोल ऊं रेहवण री सीख देवे है। मुख्यमंत्री भजनलाल शर्मा ई जनता ने होळी अर धुलंडी री शुभकामनावां दीनी है। वां रा संदेश मांय श्री शर्मा कह्यो के रंगां अर खुशियां ऊं भर्यो ओ पर्व आपसी भाईचारा अर सद्भाव बधावण री सीख देवे है। मुख्यमंत्री सामाजिक समरसता सागे ओ त्यौहार मनावण री अपील कीनी।