प्रदेश मांय होळी रा बधता उमाव बीचे न्यारी-न्यारी ठौड़ां होळी मंगलावण अर रंग खेलण री तैयारियां करी जा रही है। डीग मांय ब्रज होली महोत्सव चाल रह्यो है जद के सोमवार ने भरतपुर मांय रंगीलो महोत्सव सरू व्ह्यो। ईं मौके निकाळी ज्यी शोभायात्रा मांय बहुरूपियां रा स्वांग अर झांकियां सगळा रो ध्यान खींच्यो। पाली ज़िला रा गांवांई हलकां मांय महिलावां पारम्परिक पहराव मांय लूम्बर नाच रो मज़ो ले रही है। शेखावाटी हलका मांय ई चंग-ढफ री थाप माथे रंगारंग कार्यक्रम पेश कर्या जा रह्या है। जैसलमेर रा लक्ष्मीनाथ मिंदर मांय सोमवार ने फागोत्सव मणायी ज्यो अर न्यारी-न्यारी ठौड़ां गेर नाच रा कार्यक्रम राख्या जा रह्या है। झालावाड़ मांय होळी रे मौके ज़िला प्रशासन अर राजीविका री ओर ऊं हर्बल गुलाल अर परम्परागत व्यंजन मुहैया कराया जा रह्या है। जिला कलेक्टर अजय सिंह राठौड़ बतायो के अ सामान उपभोक्ता भंडार री मदद ऊं बाजार मांय मुहैया कराया जा रह्या है। आ मांय खुद सेवक समूहां ऊं जुड़ी महिलावां कानी ऊं पेड़-पौधां अर फूलां ऊं बणायी ज्यी गुलाल ई शामिल है। ईं रे अलावा बेसन री चक्की, लाडू, मक्खनबड़ा अर मठरी समेत भांत-भांत रा व्यंजन ई मुहैया कराया जा रह्या है।