प्रदेश मांय स्वच्छता ही सेवा अभियान रा तैत गुरूवार ने ई न्यारा-न्यारा कार्यक्रम राख्यी ज्या। पाली मांय स्वच्छता संवाद अर स्वच्छता चौपाल रे ज़रिए साफ़-सफ़ाई राखण रा बारा मांय जाग जगायी ज्यी। नीमकाथाना रा डॉ. भीमराव अंबेडकर छात्रावास मांय श्रमदान करी ज्यो। ईं मौके विद्यार्थियां ने सफ़ाई ने स्वभाव अर संस्कार मांय शामिल करण अर रोजीना श्रमदान करण री शपथ दिरायी ज्यी। बाड़मेर मांय मुख्य कार्यकारी अधिकारी सिद्धार्थ पलनीचामी आज साइकिल माथे सवार व्हे र सफाई व्यवस्था रो जायज़ो लीनो अर ज़रुरी हुकम दीना। हनुमानगढ़ मांय स्कूली बच्चा, खुद सेवक संगठनां रा सदस्य, जनता रा नुमाइंदा अर ज़िला प्रशासन रा कर्मचारी ‘स्वभाव स्वच्छता-संस्कार स्वच्छता‘ थीम माथे स्वच्छता रैली निकाळी। विद्यार्थी बाजा बजा र साफ़-सफ़ाई राखण बाबत् जाग जगायी। जिला कलेक्टर काना राम सेंट्रल पार्क मांय मौजूद लोगां ने सफ़ाई राखण री शपथ दिरायी। सिरोही मांय केंद्रीय संचार ब्यूरो रा क्षेत्रीय कार्यालय री ओर ऊं पिंडवाड़ा पंचायत समिति रा जनापुर गॉव मांय संपूर्ण पोषण अर स्वच्छता ही सेवा रा बारा मांय जाग जगावण बाबत् कार्यक्रम राख्यी ज्यो। जयपुर रा आमेर महल मांय साफ़-सफ़ाई ने बधावो देवण सारु महल परिसर मांय गुटखा, बीड़ी अर तंबाकू काम आवण वाळी हर भांत री सामग्री ले जावण परां रोक लगा दीरीजी है। आमेर महल मांय दाखिल व्हेवण री ठौड़ ही ऐड़ी सामग्री जमा करावणी व्हेला।