प्रदेश मांय सोमवार ने सवाईमाधोपुर, दौसा अर झालावाड़ समेत केई ठोडां घणो कोहरो रह्यो। सीळो बायरो ई ठण्ड रो असर बधा दीनो है, हालांकि मावठ पाछे कठे-कठे सोमवार ने तावड़ो निकळ्यो। सोमवार ने माउंट आबू मांय न्यूनतम तापमान 1 डिग्री सेल्सियस दर्ज करी ज्यो, जदके सिरोही मांय कम-ती-कम तापमान 5 दशमलव 2 डिग्री सैल्सियस रह्यो। जैसलमेर, उदयपुर, चित्तौड़गढ़, सीकर, अजमेर अर भीलवाड़ा मांय ई जोरदार सर्दी पड़ रही है। भरतपुर मांय ई तेज ठंड अर धुंअर रे कारण जिन्दगी माथे असर पड़ रह्यो है। पाळो पड़बा रा आसार ने ध्यान राखता थकां कृषि विभाग किसानां ने साखां मांय हल्की पाणत करण अर मेड़ां माथे धुंओ करण री राय दीनी है। पशुपालन विभाग ई सिंयाळा मांय ढांढा-ढोरां ने खुला मांय नी बांधण अर चारा-पाणी रो ज़रूरी प्रबंध करण री राय दीनी है।