प्रदेश मांय शुक्रवार ने सीळा साता रे मौके शीतला माता री पूजा-अर्चना करी जा रही है। ओ पर्व चैत महीना री अंधारी सातम अर आठम ने मनायो जावे है। ईं दिन साफ़-सफ़ाई अर आरोग्य री देवी शीतला माता री सीळा पकवानां रो भोग लगा र पूजा करी जावे है। ईं मौके केई ठोडां मेळा ई भरे है। जयपुर कने चाकसू रा शील डूंगरी शीतला माता मिन्दर मांय संवारे ऊं ईं मोटी तादाद मांय जातरू पूगण लाग्या। कोटा मांय टेशन रा शीतला माता मिन्दर मांय ई मोटी तादाद मांय जातरू पूग्या अर माता ने खाण-पींण री सीळी चीजां रो भोग लगायो। पाली मांय ई लुगाइयां शीतला माता रो पूजन कर र बास्योड़ा रो भोग लगा र खुशहाली री कामना कीनी। बालोतरा ज़िला रा कनाना ग़ांव मांय सीळा सातां रं मौके सालाना मेळो भर्यो, जिण मांय मोटी तादाद मांय जातरु शीतला माता रा दर्शन कीना। मेळा मांय गेर दल नाच र लोक कला अर संस्कृति री छटा बिखेरी। मेळा मांय धर्म सभा ई राख्यी ज्यी। बाड़मेर ज़िला रा गुढ़ामालानी मांय भेडाणा री शीतला माता रा मिन्दर मायं ई मेळो भर रह्यो है। राजसमंद ज़िला रा धोइंदा, राजनगर अर कांकरोली मांय सीळा सातां रे मौके रंगां ऊं होळी खेली ज्यी। भीलवाड़ा मांय ई रीत मुजब रंग-गुलाल खेल र पकवानां रो मज़ो लियो ज्यो। वठे बरसां ऊं चाल रही रीत रे मुजब जीवित व्यक्ति री शव यात्रा निकाळी ज्यी।