प्रदेश मांय शुक्रवार ने तेजा दशमी रो पर्व सिरधा भाव सागे मनायी ज्यो। ईं मौके नागौर जिला रा खरनाल मांय खास मेळो भर्यो। नीमकाथाना मांय लोक देवता तेजाजी री शोभायात्रा निकाळी ज्यी, जिण मांय मोटी तादाद मांय जातरू सिरकत कीनी। सवाईमाधोपुर ज़िला मांय न्यारी-न्यारी ठौड़ां मेळा अर दूजा धार्मिक कार्यक्रम राख्यी ज्या। झालावाड़ मांय तेजाजी रा स्थानकां माथे मोटी तादाद मांय पूग्या जातरु पूजा-अर्चना कीनी अर तेजाजी री शोभायात्रा निकाळी ज्यी। जयपुर ग्रामीण जिला मांय बस्सी उपखण्ड रा जटवाड़ा गांव मांय तेजा दशमी रे मौके सांप ने न्यौतो दियो ज्यो अर खीर, पुआ, पूड़ी रो भोग लगायी ज्यो। बारां जिला मांय ई मेळा भर्या। कोटा मांय ई तेजाजी रा थानकां माथे मोटी तादाद मांय जातरू पूग्या। शुक्रवार ने ई बाबा रामदेव जयंती रे मौके जैसलमेर जिला रा रामदेवरा मांय मोटी तादाद मांय जातरू खास पूजा अर्चना कीनी। मन्दिर समिति अर जिला प्रशासन री ओर ऊं जातरूआं रा सुबीता सारू सगळा जरूरी इंतजामात करी ज्या। चूरू मांय रामदेव जयंती रे मौके शोभा यात्रा निकाळी ज्यी। श्रीगंगानगर मांय जातरूआं सारू लंगर लगायी ज्या अर बाबा रामदेव मिंदर सामी मेळो भर्यो।