प्रदेश मांय शुक्रवार ने केई ठौड़ां मावठ व्ही जद के कठे-कठे ओळा ई पड़्या। नुवा आतूणी विक्षोभ रा असर ऊं चित्तौडगढ, पाली अर भीलवाड़ा समेत केई ठोड़ां घणी धुंअर बीचे रिमझिम बिरखा व्ही।  केकडी, चूरू, अजमेर, सीकर, नागौर अर राजधानी जयपुर मांय ई बरसात व्ही। हनुमानगढ़ जिला री भादरा तहसील रा झासल गांव मांय दोपहरां री बगत ओळा पड़्या। झुंझुनूं ज़िला रा पिलानी मांय ई तेज़ बरसात सागे ओला पड़्या। झालावाड़ ज़िला मुख्यालय सागे झालरापाटन अर भवानी मंडी मांय ई बिरखा सागे ओळा पड़बा रा समाचार है। नीम का थाना ज़िला मांय ई लारली रात ऊं बिरखा व्हे रही है। कोटा अर बारां मांय ई सिंज्यां री पोर छांटो-छिड़को व्ह्यो। भरतपुर, जयपुर ग्रामीण अर सवाईमाधोपुर ज़िलां मांय ई बिरखा व्हे रही है। नागौर मांय आखा दिन बादळा मंड्या रह्या। म्हाणा खबरनवीस बतायो के श्रीमाधोपुर, खेतडी, पाटन अर उदयपुरवाटी मांय लारली रात सरू व्ही बिरखा रुक-रुक र शुक्रवार ने दिन मांय ई चालती रही, जिण ऊं केई ठोडां पाणी भर ग्यो। मौसम केन्द्र जयपुर रा निदेशक राधेश्याम शर्मा बतायो के आवता चौबीस घंटा मांय केई ठोडां बिरखा व्हेवण अर ओळा पड़बा रा आसार है। राजसमंद मांय शीतलहर रा असर ने ध्यान राखता थकां प्रशासन एडवाइजरी जारी कीनी है अर सफाखाना मांय मरीजां रा ईलाज सारू जरूरी दवाइयां तैयार राखण रा हुकम दिया ज्या है।