प्रदेश मांय विधानसभा उपचुनाव वाळा खेतरां मांय न्यारा न्यारा राजनीतिक दळां रा नेता जोर शोर सूं पार्टी रा उम्मीदवार रे समर्थन मांय प्रचार कर रिया है। इणी कड़ी मांय दीतवार ने भाजपा रा वरिष्ठ नेता अर मुख्यमंत्री भजनलाल शर्मा दौसा मांय भाजपा प्रत्याशी रा समर्थन मांय रोड़ शो करयो। बाद मांय गांधी तिराहे माथे जनसभा ने संबोधित करता व्हीया भाजपा के पक्ष में मतदान करने की अपील की। मुख्यमंत्री दोपहरां पाछे अलवर रे रामगढ खेतर मांय भी चुनावी सभा ने संबोधित करयो। वठी ने दीतवार ने केंद्रीय मंत्री भूपेंद्र यादव रामगढ़ मांय, पार्टी रा पैली आळा प्रदेशाध्यक्ष सीपी जोशी झुंझुनूं, शिक्षा मंत्री मदन दिलावर देवली उनियारा अर खेल राज्य मंत्री के.के विश्नोई खींवसर विधानसभा खेतर मांय दौरे माथे रिया। वठी ने नेता प्रतिपक्ष टीकाराम जूली अर पैली आळा उपमुख्यमंत्री सचिन पायलट दीतवार ने रामगढ़ मांय कांग्रेस प्रत्याशी रे समर्थन मांय जनसभा ने संबोधित करयो। इण रे पाछे पायलट अर पैली आळा मंत्री प्रताप सिंह खाचरियावास, ममता भूपेश दौसा मांय कांग्रेस प्रत्याशी रे समर्थन मांय चुनावी सभा ने संबोधित कर्यो।

प्रदेश रा 7 खेतरां मांय होवण वाळा विधानसभा उप चुनाव ने लेर निर्वाचन महकमो सगळी तैयारियां पूरी कर ली है। आं चुनावां मांय मतदान दिवस रे दिन सुरक्षा रा पुख्ता इंतजाम व्हेला। चुनाव ने लेर केन्द्रीय सुरक्षा बल, पुलिस, आरएसी अर होमगार्ड रा 9 हजार सू बत्ती सुरक्षाकर्मियां ने तैनात करयो जावेला। मुख्य निर्वाचन अहलकार नवीन महाजन बतायो कि मतदान दिवस 13 नवम्बर ने आं खेतरां मांय सघन जांच अर निगराणी रे खातिर हर विधानसभा खेतर मांय फ्लाइंग स्क्वॉड, एसएसटी दळ तैनात रेवेला। चुनाव खर्च रे लिहाज सूं संवेदनशील मतदान केंद्रां मांय बेसी निगराणी टीमां तैनात करीजी है। मतदान रे चालता 1 हजार 122 मतदान केंद्रां री लाइव वेबकास्टिंग करी जावेली। मुख्य निर्वाचन अहलकार बतायो कि 7 विधानसभा खेतरां रा सगळा 1 हजार 915 मतदान केंद्र कुल 1 हजार 366 लोकेशन माथे है, जिण मांय सूं 604 मतदान केन्द्रां री लोकेशन ने संवेदनशील मान्यो ग्यो है। आं सगळी लोकेशन माथे केंद्रीय सुरक्षा बळ री तैनाती व्हेला। ध्यान जोग है कि प्रदेश रा रामगढ़, दौसा, झुंझनूं, सलूम्बर, चौरासी, खींवसर अर देवली-उनियारा मांय 13 नवंबर ने मतदान व्हेला।
प्रदेश रा 193 विधानसभा खेतरां मांय दीतवार ने सगळा मतदान केन्द्रां माथे खास शिविर लगार मतदाता सूचियां मांय संशोधन खातिर आवेदन लिया गया। उपचुनाव वाळा सात विधानसभा खेतर ने छोडर बाकी सगळा खेतरा मांय खास संक्षिप्त पुनरीक्षण-एसएसआर-2025 रे तैत अ शिविर राख्या गया। इण रे चालता नुवां नाम जोड़णे, हटाणे, पते अर फोटू मांय गळती सुधार खातिर दावा अर आपत्तियां खातिर आवेदन भी लिया गया। साथे ही मतदान केन्द्रां माथे नुवा मतदाता जका 18 बरस री उमर पूरी कर चुक्या है वाणो मतदाता सूची मांय आपरो नाम जुडवाणे खातिर ऑनलाईन अर ऑफलाईन प्रक्रिया री जाणकारी दी गई। आं शिविरां मांय मतदान खातिर जागरूकता बढाणे सारू मतदाता शपथ पठन, वोटर हेल्पलाइन एप अर निर्वाचन महकमा सूं जुडी दूजी एप्स री भी जाणकारी दी गई। प्रदेश रा सगळा 200 विधानसभा हलका खातर आखिरी मतदाता सूचियां रो प्रकाशन आवता बरस 6 जनवरी ने करयो जावेला। इण बीचे, उपचुनाव वाळा खेतरां मांय चाल री होम वोटिंग रे दूजे चरण रो दीतवार ने आखिरी दिन है।