प्रदेश मांय वरिष्ठ नागरिक तीर्थ यात्रा योजना रा तैत बुजुर्गां रो चयन करण बाबत् सोमवार ने न्यारी-न्यारी ठौड़ां लॉटरी निकाळी ज्यी । ब्यावर मांय जिला कलेक्टर डॉ. महेंद्र खड़गावत लॉटरी निकाळी। वे बतायो के ब्यावर जिला मांय कुल 1 हजार 603 अर्जियां मिली ही ज्या मांय ऊं 61 जणा नेपाल मांय काठमांडू रा पशुपति नाथ मिंदर रा दर्शन सारू हवाई सफ़र अर 305 जणा तीरथ री दूजी ठौड़ां बाबत् रेल रा सफ़र सारू चुणी ज्या। श्रीगंगानगर मांय जिला कलक्टर डॉ. मंजू लॉटरी निकाळी, जिण मांय हवाई सफ़र सारू 113 अर रेल रा सफ़र सारू 564 बुजुर्ग चुणी ज्या। भीलवाड़ा मांय आ लॉटरी मंगलवार ने निकाळी जावेला। चित्तौड़गढ़ मांय जिला कलेक्टर आलोक रंजन लॉटरी रे जरिये 808 बुजुर्गां रो चयन कीनो। आं मांय ऊं 135 बुजुर्ग हवाई जहाज ऊं अर 673 बुजुर्ग रेलगाड़ी ऊं तीरथ सारू चुणी ज्या। बालोतरा मांय जिला कलेक्टर सुशील कुमार यादव लॉटरी रे जरिये हवाई सफ़र सारू 97 अर रेल रा सफ़र सारू 486 बुजुर्गां रो चयन कीनो। जैसलमेर मांय जिला कलेक्टर प्रताप सिंह ई-देवस्थान पोर्टल रो बटन दबा र लॉटरी निकाळी। वठे 292 बुजुर्ग रेल ऊं अर 58 बुजुर्ग हवाई जहाज ऊं तीरथ करण सारू जावेला।