प्रदेश मांय बुधवार ने राष्ट्रीय सड़क सुरक्षा माह सरू व्ह्यो। ईं रा तैत 31 जनवरी तांई सड़कां माथे हिफाजत अर आवण-जावण रा नियमां रा बारा मांय जाग जगावण सारू खास कार्यक्रम राख्या जावेला। इण रो ईं साल रो मुद्दो ‘‘परवाह’’ राख्यी ज्यो है। ईं मौके हनुमानगढ़ मांय बुधवार ने जागरुकता रैली निकाळी ज्यी। करौली मांय यातायात पुलिस न्यारी-न्यारी ठोड़ां चैक प्वाइंट बणा र यातायात नियम नी मानण वाळां रे खिलाफ कार्रवाई कीनी। वठे हेलमेट लगाओ- जान बचाओ अभियान रा तैत हेलमेट जनजागरुकता बाइक रैली निकाळी ज्यी। पाली मांय सड़क हादसां माथे काबू करण सारू पुलिस री नुवी तकनीक वाळी इंटरसेप्टर गाड़ी रो उद्घाटन करी ज्यो। झुंझुनूं रा खास-खास गेलां ऊं व्हेती थकी ई-रिक्शा रैली निकाळी ज्यी। ज़िला परिवहन अधिकारी डॉ. मक्खन लाल जांगीड़ बतायो के ई-रिक्शा रे मार्फत महीना भर तांई यातायात नियमां री जाणकारी दी जावेला। बाड़मेर मांय मल्लीनाथ चौराहा ऊं वाहन रैली निकाळ र यातायात नियमां री पालना करण रो संदेश दियो ज्यो। ब्यावर मांय ई यातायात पुलिसकर्मी दूजां सागे रैली निकाळ र दुपहिया वाहन चलाती बगत हेलमेट लगावण री अपील कीनी।