प्रदेश मांय रात री बगत ठंडक मांय बधोतरी व्हेवण लागी है। अधिकतर स्थानां परां रात रा तापमान मांय गिरावट व्ही है। सब ऊं ज्यादा साढे 9 डिग्री री गिरावट फलौदी रा तापमान मांय व्ही। हाल फिलहाल प्रदेश रा 6 स्थानां माथे रात रो पारो 15 डिग्री सैल्सियस या इण ऊं नीचे आ ग्यो है। आज सब ऊं कम 12 दशमलव 7 डिग्री सैल्सियस तापमान सीकर रा फतेहपुर मांय दर्ज करी ज्यो। जयपुर मांय रात रा पारा मांय सवा तीन डिग्री री गिरावट व्ही अर ओ 19 दशमलव 8 डिग्री दर्ज कियो गयो। मौसम विभाग आगामी रविवार तांई मौसम शुष्क रेहवण री संभावना जताई है।