प्रदेश मांय आज ई केई ठोडा बिरखा व्हेवण रा समाचार है। पाली मांय चौखो मेह बरस्यो जदके सवाईमाधोपुर मांय दोपहरां पाछे छांटो छिड़को व्ह्यो। कोटा ज़िला रा पीपलदा हलका मांय ईआरसीपी रा तैत कालीसिंध नदी माथे बणायी ज्या पहला बंधा ’नोनेरा एबरा’ मांय पाणी आ रह्यो है। चूरू मांय ई आज करीब दो घंटा तांई व्ही झमाझम बिरखा ऊं केई ठोड़ां पाणी भर ग्यो। सिरोही जिला मांय ई रुक-रुक र तेज़ बारिश व्ही। लारला 24 घंटां मांय सिरोही ज़िला रा माउंट आबू अर सिरोही मांय 3-3 इंच अर रेवदर मांय 2 इंच बारिश दर्ज करीजी। बांसवाड़ा रा माही बजाज सागर बंधा रा 8 दरूजा खोल र पाणी निकाळ्यो जा रह्यो है। टोंक जिला रा बीसलपुर बंधा रा ई 6 दरूजा खोल र पाणी निकाळ्यो जा रह्यो है। हनुमानगढ़ जिला मांय ई बरसात व्ही। नीमकाथाना मांय आज दोपहर करीब 1 घंटा तांई लगातार ज़ोरदार पाणी बरस्यो। चितौड़गढ़ मांय ई आज संवारे हल्की बौछारां पड़ी। मौसम विभाग प्रदेश मांय अवता चार-पांच दिन चौमासा री बिरखा चालती रेहवण अर ऊगणी हलका मांय कठे-कठे भारी बारिश रा आसार जताया है। उदयपुर मांय ई 3 दिन रा आंतरा पाछे आज करीब सवा घंटा तांई जोरदार मेह बरस्यो, जिण ऊं न्यारी-न्यारी ठोडा पाणी भर ग्यो।