प्रदेश मांय बाज रह्या सीळा बायरा ऊं ठण्ड रो असर तेज व्हे ग्यो है। धौलपुर, पाली, जैसलमेर, बारां, कोटा, करौली अर माउंटआबू समेत केई ठोड़ां शीतलहर चालण लागी है। सीकर ज़िला रा फतेहपुर शेखावाटी मांय पहली दफा बुधवार ने पारो शून्य ऊं एक डिग्री सैल्सियस नीचे उतर ग्यो। सीकर मांय डोढ़, चूरू मांय 1 दशमलव 8 अर हनुमानगढ़ ज़िला रा संगरिया मांय अढ़ाई डिग्री सेल्सियस तापमान दर्ज करी ज्यो। राजधानी जयपुर मांय ई पारो उतर र 8 डिग्री सेल्सियस दर्ज करी ज्यो। सरहदी ज़िला जैसलमेर मांय ई तेज़ सर्दी अर कोहरा रे बावजूद बीएसएफ रा जवान 24 ई घंटा सरहद री हिफाजत मांय लाग्योड़ा है। वठे शीतलहर ऊं आम जिन्दगी माथे घणो असर पड़ रह्यो है। मौसम केन्द्र, जयपुर आवता 4-5 दिन तांई केई ठोड़ां शीतलहर रो दौर चालतो रेहवण रा आसार जताया है। उत्तर ऊं आ रह्या सीळा बायरा रा असर ऊं प्रदेश मांय आवता 24 घंटा मांय पारो 2 डिग्री सेल्सियस तांई उतरण रा आसार है।