प्रदेश मांय पड़ रही तेज़ ठारी बीचे केई ठौड़ां कोहरो व्हेवण ऊं जिन्दगी माथे असर पड़ रह्यो है। राज्य रा ऊगणी हलकां मांय आज संवारे कोहरा रे कारण आवण-जावण माथे असर पड़्यो। भरतपुर मांय हाई-वे माथे बुधवार ने संवारे यातायात मंथर गति ऊं चाल्यो। ईं बीचे सीकर ज़िला रा फतेहपुर मांय बीती रात पारो ओजू शून्य ऊं नीचे उतर ग्यो। हनुमानगढ़ ज़िला रा संगरिया मांय ई आज ठण्ड रो ज़ोर रह्यो। वठे न्यूनतम तापमान एक दशमलव 3 डिग्री सेल्सियस दर्ज करी ज्यो। चूरू मांय 1 दशमलव 8, टोंक मांय 1 दशमलव 9, सीकर मांय 2 दशमलव 8, करौली मांय 3 दशमलव 4, माउंट आबू मांय 3 दशमलव 8, पिलानी मांय 4 दशमलव 1 अर बीकानेर मांय 5 डिग्री सेल्सियस न्यूनतम तापमान नापी ज्यो। ईं बीचे मौसम विभाग काल सीकर अर चूरू मांय घणी ज़ोरदार ठारी पड़बा सारू चेतायो है। महकमो आवता 4 दिन शीतलहर चालण रा आसार जताया है जद के शुक्रवार ऊं बारां, बूंदी, दौसा, धौलपुर, करौली, कोटा अर सवाईमाधोपुर मांय घणी धुंअर रेहवण री संभावना है।