प्रदेश मांय पारो उतरण सागे ठंड रो असर बधबा लाग्यो है। बीती रात राज्य मांय 10 ऊं बत्ती ठोड़ां न्यूनतम तापमान 10 डिग्री सेल्सियस ऊं नीचे उतर ग्यो। मौसम केंद्र जयपुर री ओर ऊं जारी रपट रे मुजब माउंट आबू मांय रात री बगत सब ऊं कम 5 डिग्री सेल्सियस तापमान दर्ज करी ज्यो। सीकर मांय 7, सिरोही मांय 8 दशमलव 1 अर चूरू मांय रात री बगत पारो 8 दशमलव 6 डिग्री सेल्सियस नापी ज्यो। केई दूजी ठोड़ां ई रात री बगत तापमान 12 डिग्री सेल्सियस ऊं नीचे उतर ग्यो। रात सागे दिन मांय ई पारो उतर्यो है। केई ठोड़ां अधिकतम तापमान ई औसत ऊं कम दर्ज करी ज्यो। मौसम विभाग रे मुजब आवता दो-तीन दिन मांय घणखर ठोड़ां तापमान मांय कोई खास बदलाव रा आसार नी है। हालांकि प्रदेश रा उतराद हलका मांय संवारे री पोर धुंअर रेहवण रा आसार है।