प्रदेश मांय पारो उतरण सागे हवा री गुणवत्ता माथे घणो असर व्हे रह्यो है। लारला दो-तीन दिन मांय केई ठौड़ां हवा री गुणवत्ता खराब ऊं घणी खराब रेंज मांय मापी ज्यी। देश मांय न्यारी-न्यारी ठौड़ां लारला 24 घंटा मांय हवा री गुणवत्ता रा हालात रा बारा मांय केंद्रीय प्रदूषण नियंत्रण मंडल कानी ऊं मंगलवार ने जारी करी ज्यी रपट रे मुजब प्रदेश मांय ई केई ठौड़ां हवा री गुणवत्ता खराब मिली। दिल्ली कने भिवाड़ी मांय एयर क्वालिटी इंडेक्स-एक्यूआई 300 ने पार कर ग्यो। ईं सागे ई, बारां, भरतपुर, धौलपुर, झुंझुनू, करौली अर सीकर मांय ई घणो प्रदूषण मिल्यो है। राजधानी जयपुर मांय ई न्यारी-न्यारी ठौड़ां हवा री गुणवत्ता घणी खराब रही। शहर मांय न्यारी-न्यारी ठौड़ां एक्यूआई 200 ऊं ऊंचो मापी ज्यो। बीकानेर मांय ई हवा री गुणवत्ता माथे असर पड़्यो है। झुन्झुनू मांय एयर क्वालिटी इंडेक्स 228 दर्ज करी ज्यो। घणा प्रदूषण रे कारण बुजु़र्गां अर अस्थमा रा मरीजां ने सांस लेवण मांय परेशानी रो सामो करणो पड़ रह्यो है। ज़िला कलेक्टर रामावतार मीणा स्वास्थ्य विभाग रा अहलकारां ने सांस लेवण मांय तकलीफ़ रा मरीज़ां सारु अस्पतालां मांय खास प्रबंध करण रा हुकम दीना है। जिला प्रशासन जनता ने घर ऊं बाहर जाती बगत मास्क काम लेवण री राय दीनी है।