राज्य मांय ज़ोरदार ठण्ड पड़बा लागी है। प्रदेश मांय न्यूनतम तापमान औसतन 11 डिग्री सेल्सियस ऊं नीचे उतर ग्यो है। सीकर ज़िला रा फतेहपुर मांय पारो गुरूवार ने ई शून्य ऊं नीचे दर्ज करी ज्यो, जदके सीकर शहर मांय ई तापमान उतर र एक डिग्री सेल्सियस नापी ज्यो। करौली मांय न्यूनतम तापमान 2 दशमलव 2 डिग्री सेल्सियस रिकॉर्ड करी ज्यो। म्हाणा खबरनवीस बतायो के हाड़ कंपाती ठंड ऊं बचण सारू लोग भांत-भांत रा जतन कर रह्या है। राजधानी जयपुर मांय ई पारो उतर र 6 दशमलव 8 डिग्री सेल्सियस दर्ज़ करी ज्यो। सवाईमाधोपुर अर झुंझुनूं मांय ई खुला हलकां मांय बर्फ जमी निजर आयी। हनुमानगढ, श्रीगंगानगर अर पाली समेत केई ठोड़ां सीळो बायरो बाजण ऊं ठिठुरन बध ग्यी है। मौसम केन्द्र जयपुर आवता 3-4 दिन केई ठोड़ां शीतलहर रा हालात रेहवण रा आसार जताया है।