प्रदेश मांय न्यारी-न्यारी ठौड़ां आज ई बिरखा व्हेवण रा समाचार है। धौलपुर ज़िला मांय काल रात ऊं व्हे रही बारिश ऊं न्यारा-न्यारा गेला माथे पाणी भर ग्यो है, जिण ऊं आवण-जावण मांय परेशानी व्हे रही है। ज़िला रा आंगई बंधा रा छह दरूजा खोल र बत्तो पाणी पार्वती नदी मांय छोड़्यो जा रह्यो है। जिला प्रशासन पार्वती नदी रे आरे-सारे बस्योड़ा गांवां मांय हाई अलर्ट रो ऐलाण कीनो है। हाड़ौती अंचल मांय लगातार बारिश रे कारण चंबल नदी मांय ई पाणी खतरा रा निशाण रे करीब पूग ग्यो है। प्रशासन नदी री कोर कने बस्योड़ा करीब 50 गांवां मांय हाई अलर्ट रो ऐलाण कर र एस.डी.आर.एफ. री टीमां तैनात कीनी है। सवाईमाधोपुर मांय आज आपदा प्रबंधन अर सहायता अर नागरिक सुरक्षा मंत्री डॉ. किरोड़ी लाल मीणा हालात रो जायजो लीनो अर अहलकारां ने ज़रूरी हुकम दीना। जयपुर रा केई हलकां मांय ई आज संवारे जोरदार मेह बरस्यो। बांसवाड़ा मांय व्ही मूसलाधार बारिश ऊं नदी-नाळां मांय पाणी उफण रह्यो है। पाली अर सवाईमाधोपुर मांय ई चोखी बिरखा व्हे रही है। मौसम विभाग प्रदेश रा ऊगणी ज़िलां मांय आवता तीन-चार दिन चौमासा री बिरखा व्हेवण रा आसार जताया है। आज कोटा अर भरतपुर संभाग मांय कठे-कठे भारी ऊं घणी भारी बारिश रा आसार है। जयपुर, अजमेर अर उदयपुर संभाग मांय ई कठे-कठे भारी बारिश रा आसार है।