प्रदेश मांय नुवा पश्चिमी विक्षोभ रा असर ऊं बुधवार ने केई ठौड़ां मावठ रा समाचार है। राजधानी जयपुर रा केई हलकां मांय आज दोपहरां पाछे व्ही बरसात ऊं नीचला हलकां मांय पाणी भर ग्यो। दौसा अर कोटा मांय रिमझिम बारिश व्ही। बारां ज़िला रा सीसवाली अर मांगरोल मांय छांटो-छिड़को व्ह्यो। चित्तौड़गढ रा गावांई हलकां मांय व्ही मावठ ऊं किसानां रा चेहरा मुळक ग्या। करौली मांय ई छांटो-छिड़को व्ह्यो। झालावाड़ अर बाड़मेर मांय सीळो बायरो बाजतो रह्यो। करौली मांय तेज़ ठंड ने ध्यान राखता थकां ज़िला कलेक्टर पहली ऊं 8वीं कक्षा तांई रा विद्यार्थियां सारु काल री छुट्टी रो ऐलाण कर दीनो है। भरतपुर मांय व्हे रही धुंअर ऊं आवण-जावण माथे असर पड़ रह्यो है। म्हाणा सवाईमाधोपुर खबरनवीस बतायो के संवारे रा कोहरा पाछे दिन मांय व्ही बिरखा ऊं गलन बध ग्यी है। मौसम केन्द्र जयपुर रे मुजब आज टोंक, जयपुर, दौसा, करौली, अलवर, सवाईमाधोपुर, बारां, कोटा, भरतपुर अर धौलपुर ज़िलां मांय बिरखा व्हेवण अर कठे-कठे ओला पड़बा रा आसार है।