प्रदेश मांय दिसम्बर महीना मांय होवण वाळा राइजिंग राजस्थान ग्लोबल इन्वेस्टमेंट समिट ऊं पैला न्यारा न्यारा जिलां मांय इन्वेस्टर मीट व्हे री है। बारां मांय आज व्ह्या ई कार्यक्रम मांय कोई 580 करोड़ रिप्या रा 46 एमओयू करी ज्या। ई दौरान कार्यक्रम मांय बोलता प्रभारी मंत्री ओटाराम देवासी कयो के राज्य सरकार रो लगस राजस्थान री अर्थव्यवस्था ने साढे तीन सौ मिलियन डॉलर तांई पूगावणो है। इण ई तरह शाहपुरा मांय व्ही इन्वेस्टर मीट मांय 75 एमओयू व्ह्या। इण री मार्फत कुल 1 हजार 435 करोड़ रिप्या रो निवेश व्ह्यो। प्रभारी मंत्री डॉ. मंजू बाघमार निवेशकां ऊं कह्यो के राज्य सरकार वां रा उद्योगां री थापना मांय हर होवण वाळी मदद करेला। डीग जिला मांय निवेश ने लुभावण सारू राईजिंग राजस्थान इन्वेस्टर मीट काले व्हेला। जिला कलेक्टर उत्सव कौशल बतायो के समिट मांय पेला 109 करोड़ रिप्या ऊं बत्ती रा 16 एमओयू व्हे चुक्या है। इण ऊं चार सौ ऊं बत्ती लोगां ने रूजगार मिलेला। इण रे अलावा ई निवेश आवण री आस है। पाली जिला रो निवेशक सम्मेलन काले फालना मांय व्हेला। जिला कलेक्टर एल.एन. मंत्री ई मीट री तैयारियां रो जायजो लियो। काले होवण वाळी मीट रे दौरान निवेशकां ने लुभावण सारू वोकल फॉर लोकल नुमाइश ई व्हेला। चित्तौड़गढ़ मांय इन्वेस्टर मीट 24 अक्टूबर ने व्हेला। इण मांय 10 हज़ार करोड़ रिप्या रा एमओयू होवण रा आसार है।