प्रदेश मांय थावर ने श्रीगंगानगर, पाली, हनुमानगढ अर राजधानी जयपुर समेत केई ठोड़ां मेह बरस्यो। श्रीगंगानगर मांय थावर ने दूजा दिन ई दोपहर ऊं सरू व्ह्यो हल्की बिरखा रो दौर रूक-रूक र चालतो रह्यो। म्हाणा खबरनवीस बतायो के मौसम मांय आया बदलाव अर घणा कोहरा ऊं जिन्दगी माथे असर पड़्यो है। नीम का थाना रा उदयपुरवाटी, श्रीमाधोपुर अर पाटन हलकां मांय छांटो छिड़को व्हे रह्यो है। करौली मांय ई कठे-कठे छांटा पड़्या। बारां अर सवाईमाधोपुर मांय आखा दिन बादळां मंड्या रह्या अर सीळो बायरो बाज्यो। डीग मांय कोहरो रह्यो। लारला चौबीस घंटा मांय चूरू, फलौदी, जोधपुर, ओसियां, बीकानेर, डेगाना, जैसलमेर, अलवर अर अजमेर मांय हल्की बरसात व्ही। ईं बीचे माउंट आबू मांय न्यूनतम तापमान 3 दशमलव 4 डिग्री सेल्सियस दर्ज करी ज्यो। मौसम केन्द्र जयपुर रा निदेशक राधेश्याम शर्मा बतायो के प्रदेश मांय पश्चिमी विक्षोभ रो असर आवता कुछ घंटा और रेहवेला।