प्रदेश मांय थावर ने गणेश चौथ रो पर्व सिरधा भाव अर उमाव सागे मनायो जा रह्यो है। जयपुर रा मोती डूंगरी गणेश मिंदर मांय तड़के ऊं ई जातरू पूगण लाग्या। सवाईमाधोपुर ज़िला रा त्रिनैत्र गणेश मिंदर मांय ई देश भर ऊं जातरू पूग्या। करौली जिला रा रारा शाहपुर मांय राख्यी ज्या मेळा मांय गृह राज्य मंत्री जवाहर सिंह बेढम ई सिरकत कीनी। जोधपुर मांय गणेश जी रा न्यारा-न्यारा मिंदरां मांय खास सिणगार करी ज्यो। शहर मांय 200 ऊं बत्ती ठौड़ां गणपति व्ही री मूर्तियां बिठायी ज्यी है। गणेश जी री मूर्तियां बिठावण सागे ई दस दिन रो गणेशोत्सव ई सरू व्हे ग्यो है। गणेश चौथ रे मौके रातानाड़ा गणेश मिंदर सामी खास मेळो भर रह्यो है। सोजती गेट रा विघ्नविनाशक मिंदर मांय ई फूलां ऊं सोहवणी झांकी सजाई ज्यी। करीब 200 साल जूनी सिद्ध गणपति री मूरत ने मूंग, चावल, चणां, चंवला अर मोठ री दाळ ऊं बणायी ज्यी पोशाक पहनाई ज्यी अर गणेशजी ने मेवां री माळा पहरायी ज्यी। चूरू रा जूना गणेश मिंदर मांय संवारे ऊं ई मोटी तादाद मांय जातरू पूगण लाग्या। देपालसर रा मिंदर मांय मेळो भर रह्यो है। पाली अर सांचौर मांय ई घरां अर पण्डालां मांय गणेश जी री मूर्तियां बिठायी ज्यी है। सीकर मांय फतेहपुर गेट रा विजय श्री गणेश मिंदर मांय ई मोटी तादाद मांय जातरू गजानन्द जी री पूजा कर रह्या है।