प्रदेश मांय चौमासा री चौखी बिरखा रो दौर लगातार चाल रह्यो है। लारला 24 घंटा मांय बांसवाड़ा ज़िला रा भूंगड़ा मांय सब ऊं बत्ती 115 मिलीमीटर बिरखा व्ही। डूंगरपुर अर उदयपुर मांय ई कठे-कठे जोरदार बिरखा व्ही। मंगलवार ने हनुमानगढ़, श्रीगंगानगर, लालगढ़, करणपुर अर गजसिंंहपुर मांय चोखो मेह बरस्यो। सीकर अर फतेहपुर मांय ई जोरदार बिरखा रा समाचार है। सिरोही ज़िला मांय माउंट आबू समेत न्यारी-न्यारी ठोड़ां बिरखा व्ही। चूरू मांय दोपहरां पाछे बिरखा व्ही। राजसमंद मांय व्ही बिरखा ऊं नदी-नाळा मांय पाणी उफणबा लाग्यो है। उदयपुर मांय व्ही बिरखा पाछे उदय सागर रा चार दरुजा खोल दिया ज्या है। बांसवाड़ा रा माही बजाज सागर बंधा रा ई चार दरूजा खोल र बत्तो पाणी निकाळ्यो जा रह्यो है। संभागीय आयुक्त डॉ नीरज के पवन पूजा-अर्चना कर र ऐ दरूजा खोल्या। 281 दशमलव 50 मीटर बूता रा माही बजाज सागर बंधा मांय 280 मीटर तांई पाणी भर ग्यो है। जैसलमेर शहर, चांधन अर रामगढ़ मांय ई चोखो मेह बरस्यो। बालोतरा अर नीम का थाना मांय आखा दिन बादळा मंड्या रह्या। ईं बीचे अजमेर मांय ईं साल अगस्त महीना मांय व्ही 475 दशमलव 4 मिलीमीटर बिरखा व्ही जो 69 साल मांय सब ऊं बत्ती है। मौसम केंद्र जयपुर आवता चार-पांच दिन कोटा, भरतपुर, अजमेर, उदयपुर अर जयपुर संभाग मांय बिरखा रा आसार जताया है।