प्रदेश मांय घणखर ठौड़ां पारो उतरण सागे ठण्ड रो असर बधबा लाग्यो है। मौसम विभाग ऊं मिली जाणकारी रे मुजब राज्य मांय 18 ठौड़ां रात री बगत पारो 15 डिग्री सेल्सियस या इण ऊं नीचे उतर ग्यो है। सब ऊं कम 9 डिग्री सैल्सियस तापमान माउंट आबू मांय दर्ज़र् करी ज्यो। मैदानी हलकां मांय सीकर ज़िला रो फतेहपुर सब ऊं सीळो रह्यो जठे तापमान 9 दशमलव 2 डिग्री सेल्सियस दर्ज करी ज्यो। राजधानी जयपुर मांय ई न्यूनतम तापमान 14 डिग्री सैल्सियस नापी ज्यो। ठण्ड मांय बधोतरी सागे ई केई ठौड़ां सोमवार ने संवारे कोहरो रह्यो। भरतपुर मांय कोहरा रे कारण हाई-वे परां आवण जावण मांय परेशानी महसूस व्ही। प्रदेश रा उतराद हलकां मांय ई कोहरा रो असर रह्यो। ईं बीचे मौसम विभाग आवता दिनां मांय मौसम सूखो रहवण रा आसार जताया है। विभाग रे मुजब आवता 2-3 दिन श्रीगंगानगर, हनुमानगढ़, झुन्झुनू, सीकर अर चूरू जिलां रा कुछ हलकां मांय घणी धुंअर रहवण रा आसार है। महकमो आवता 5 दिन मांय प्रदेश रा घणखर हलकां मांय न्यूनतम तापमान 1 ऊं 2 डिग्री सेल्सियस उतरण रा आसार जताया है।