प्रदेश मांय आवता तीन-चार दिन तांई घणखर ठौड़ां चैमासा री बिरखा व्हेवण रो अनुमान है। मौसम विभाग रविवार ने सगळा ज़िलां सारू बिरखा रो यलो अलर्ट जारी कीनो है। मौसम केन्द्र जयपुर रा निदेशक राधेश्याम शर्मा बतायो के आवता दो दिन मांय बिरखा मांय बधोतरी सागे भरतपुर, उदयपुर अर जयपुर संभाग रा कुछ हलकां मांय मझला ऊं तेज़ दर्जा री बारिश व्हे सके है। ईं दौरान प्रदेश रा ऊगणी हलकां मांय एक-दो ठौड़ ज़ोरदार ऊं घणी ज़ोरदार बिरखा व्हेवण रा आसार है। ईं बीचे थावर ने अजमेर अर किशनगढ समेत कई हलकां मांय थोड़ी देर तांई चोखो मेह बरस्यो। चूरू जिला रा सादुलपुर अर धौलपुर ज़िला रा राजाखेडा मांय काल व्ही झमाझम बिरखा पाछे केई हलकां मांय पाणी भर ग्यो। डांग हलका मांय व्ह्या चोखा मेह ऊं पार्वती नदी मांय ई पाणी री आमद बध ग्यी है। भरतपुर ज़िला रा बारेठा बांध मांय ई पाणी रो लेवल लगातार बध रह्यो है।