प्रदेश मांय घणखर ठोड़ां दिन री बगत ई पारो उतरण ऊं ठण्ड रो असर और बध ग्यो है। लारला चौबीस घंटा मांय राजधानी जयपुर समेत 17 ठोड़ां दिन री बगत पारो सामान्य ऊं नीचे दर्ज करी ज्यो। फतेहपुर मांय रात री बगत पारो लारला छह दिन तांई शून्य ऊं नीचे रह्यां पाछे मंगलवार ने अढ़ाई डिग्री सेल्सियस रिकॉर्ड करी ज्यो। मंगलवार ने करौली राज्य मांय सब ऊं ठण्डी ठौड़ रह्यो, जठे कमती कम तापमान 1 दशमलव 3 डिग्री सेल्सियस नापी ज्यो। संगरिया मांय 3 दशमलव 4, सीकर मांय 3 दशमलव 7, माउंट आबू अर चूरू मांय 4, अलवर मांय 4 दशमलव 2, श्रीगंगानगर अर धौलपुर मांय 4 दशमलव 8 अर नागौर मांय 5 दशमलव 1 डिग्री सेल्सियस तापमान रिकॉर्ड करी ज्यो। सवाईमाधोपुर, भीलवाडा, उदयपुर, चित्तौडगढ अर जालौर मांय ई ज़ोरदार ठण्ड पड़ रही है। म्हाणा झुंझुनूं खबरनवीस बतायो के ज़िला रा गांवाई हलकां मांय मंगलवार ने संवारे बर्फ री परत निजर आयी। ईं बीचे मौसम विभाग काल एक कमज़ोर आतूणी विक्षोभ रा असर ऊं न्यूनतम तापमान मांय मामूली गिरावट रा आसार जताया है। महकमा रे मुजब राज्य मांय शीतलहर रो दौर आवता 4-5 दिन तांई चालतो रेहवण री संभावना है। मौसम विभाग 20 दिसम्बर ऊं कोटा अर भरतपुर संभाग मांय संवारे री पोर कठे-कठे घणो कोहरो रेहवण री शंका जतायी है।