राज्य मांय खाद्य सुरक्षा योजना रो फायदो लेवण वाळां री फेहरिश्त मांय हाल तांई 8 लाख 91 हजार 400 ऊं बत्ता नुवा नाम जोड़ी ज्या है। खाद्य अर नागरिक आपूर्ति मंत्री सुमित गोदारा मंगवार ने विधानसभा मांय आ जाणकारी दीनी। वे बतायो के 26 जनवरी ने खाद्य सुरक्षा पोर्टल खुल्यां पाछे नुवा नाम जोड़बा रो काम चाल रह्यो अर इण रो फायदो बत्ता ऊं बत्ता लोगां ने मुहैया करावण सारू ई-केवाईसी करावण री आखिरी तारीख बधा र 31 मार्च कर दीरीजी है। सदन मांय उपमुख्यमंत्री अर पर्यटन मंत्री दीया कुमारी सैलानियां ने जरूरी सुबीता मुहैया करावण सारू बेगो ई मोबाइल एप लाँच करण रो ऐलाण कीनो। वे कह्यो के ईं री मदद ऊं सैलाणियां ने नजदीकी पुलिस थाणा, अस्पताल, सैर-सपाटा री ठोड़ां, आवण-जावण रा साधनां ऊं जुड़ी अर दूजी ज़रूरी जाणकारियां आसानी ऊं मिल सकेला। दीया कुमारी बतायो के जयपुर रा चौड़ा रास्ता मांय बणायी ज्या पर्यटक सुविधा केन्द्र ने चालू करण रो फैसलो बेगो ई लियो जावेला। विधानसभा मांय मंगलवार ने मुख्यमंत्री भजनलाल शर्मा भारतीय जनता पार्टी रा विधायक दल री मीटिंग ने संबोधित कीना। वे सत्र रे दौरान सदस्यां ने सदन मांय पूरी तैयारी सागे बोलण बाबत् कह्यो। वे सदन री कार्यवाही बिना अड़चन रे चलावण सारु आपसी तालमेल बणा र काम करण बाबत् ई कह्यो।