प्रदेश मांय लारला दिनां ऊं चाल री तेज बिरखा ऊं आज आराम मिल्यो है। फेरू ई कुछ ज़िला मांय आज ई हळका ऊं मझला दर्जा री बिरखा व्ही है। केई ज़िला मांय मौसम साफ होवण ऊं आज सूरज रा दरसण व्ह्या जिण ऊं लोगां ने आराम मिल्यो, सिंज्या व्ह्ता-व्हता केई ठौड़ां फेरू बिरखा व्ही। केई ज़िला मांय लारला दिनां व्ही बिरखा ऊं पाणी भराव रा हालात बण ग्या है। अजमेर रा निचला हलका मांय अजै ई पाणी भर्यो है अर प्रशासन पाणी निकाळण री कोशिश कर रह्यो है। दौसा मांय तीन दिन पछे आज बिरखा रो सिलसिलों थम ग्यो फेरू ईं बंधा मांय पाणी री आवण व्हे री है। करौली मांय पांचना बन्धा मांय ऊं दो गेट खोल ने पाणी री निकासी करी जाय री है। सलूम्बर ज़िला मांय एक हफ्ता ऊं व्हे री बिरखा ऊं नदी नाळा अर तलाब मांय पाणी री आवक व्हे री है। केकड़ी जिला मांय घणी बिरखा होवण ऊं उन्हाळू साख री फसला खराब व्हे रही है। डीग मांय मॉनसून सीजन मांय रिकॉर्ड तोड़ बिरखा रे कारण जिन्दगी माथे असर पड़्यो है। जयपुर रा कुछ हलकां मांय आज हळका ऊं मझला दर्जा री बिरखा व्ही। मौसम मेहकमो कह्यो है के आज कोटा, उदयपुर, जयपुर, जोधपुर, भरतपुर अर अजमेर संभाग रा कुछ हळका मांय मझला दर्जा री बिरखा अर कोटा, उदयपुर संभाग मांय कठे-कठे ई भारी बिरखा होवण री आस है। मौसम मेहकमां रा निदेशक राधेश्याम शर्मा बतायो के आवता चार-पांच दिन अगूणी ज़िला मांय अजै ई मझला दर्जा ऊं भारी बिरखा होवण रा आसार है।