प्रदेश मांय आवता दो दिनां मांय तापमान मांय कमी आवण रा आसार है। मौसम विभाग मुजब कमती रा तापमान मांय 2 ऊं 4 डिग्री सेल्सियस री कमी आ सके है। वठे ई बीकानेर, जयपुर अर भरतपुर संभाग मांय कठे-ई-कठे सीळो बायरो चालण री आस है। इण रे साथे ही 8 ऊं 10 जनवरी तांई उदयपुर अर कोटा संभाग रा ज़िला मांय ई सीळा बायरा रो असर रह सके है। ई बीचे मंगलवार ने नागौर मांय करड़ी ठण्ड रो असर रीयो अर कमती रो तापमान 2 दशमलव 5 डिग्री सेल्सियस रिकॉर्ड व्ह्यो। सिरोही, भीलवाडा, चित्तौडगढ, दौसा, जालौर, पिलानी, बीकानेर, जोधपुर अर जैसलमेर मांय कमती रो तापमान 7 डिग्री सेल्सियस ऊं नीचे रीयो। केई ठौड़ां घणी धूअर छायी ज्यी री। उत्तर-पश्चिम रेलवे रा मुख्य जनसम्पर्क अहलकार शशि किरण बतायो के कोहरा रे कारण केई रेलगाड़ियां देरी ऊं चाल री है। हवाई यातायात माथे ई इण रो असर दिख्यो। जयपुर मांय कोहरा रे कारण लगातार उड़ानां रो बगत बिगड़ रीयो है। ई कारण गुजरी रात अर मंगलवार ने सवांरा जयपुर एयरपोर्ट ऊं 11 उड़नां आप रा तैय वक्त माथे नी तो आय सकी अर नी उड़ान भर सकी। न्यारा-न्यारा बगत माथे दिल्ली बेंगलुरु, मुंबई, गोवा अर दुबई सारू उड़ानां बगतसर नी जा सकी। वठे ई कुछ उड़ाना आप रा तय बगत माथे नी उतर सकी। ई कारण घणी तादादर मांय यात्रियां ने जयपुर हवाई अड्डा माथे परेशान व्हणो पड़्यो। राज्य मांय ठण्ड रा तीखा तेवर देखता स्कूलां मांय सर्दी री छुट्टीयां बधा दीरीजी है। ठण्ड रे कारण कोई 20 जिलां रा स्कूलां मांय छुट्टी कर दीरीजी है। माध्यमिक शिक्षा निदेशक आशीष मोदी हुकम काड़ ने ज़िलां कलेक्टरां ने 11 जनवरी तांई छुट्टी ऐलाण करण सारू मुकर कर्या है।