प्रदेश मांय आवता दो-तीन दिन मांय पारो दो ऊं तीन डिग्री सेल्सियस तांई उतरण रा आसार है। मौसम विभाग रे मुजब बीकानेर, जयपुर, भरतपुर अजमेर अर कोटा संभाग मांय 15 अर 16 जनवरी ने कठे-कठे छांटो-छिड़को व्हेवण अर कठे-कठे ओला पड़बा रा आसार है। ईं बीचे राज्य रा ऊगणी हलका मांय सोमवार ने छांटा पड़्या, जदके सवाईमाधोपुर अर चित्तौडगढ समेत कठे-कठे घणो कोहरो रह्यो। सिरोही मांय 4 डिग्री सेल्सियस न्यूनतम तापमान सागे शीतलहर रो असर रह्यो। चित्तौडगढ अर बाड़मेर मांय ई सींळो बायरो बाजण ऊं गलन बध ग्यी। चित्तौडगढ ज़िला रा बेगू मांय हल्की बिरखा रा समाचार है। महकमो जबरदस्त ठण्ड ने ध्यान राखता थकां बच्चां अर बुजुर्गां ने और सावचेती राखण री राय दीनी है। ईं बीचे जोधपुर मांय पड़ रही जबरदस्त ठण्ड ने ध्यान राखता थकां प्रशासन सरकारी अर गैर सरकारी स्कूलां रा बच्चां सारू मंगलवार ने अर 15 जनवरी ने छुट्टी रो ऐलाण कर दीनो है। ज़िला रा आंगनबाड़ी केन्द्रा मांय मंगलवार ऊं 18 जनवरी तांई छुट्टी रो ऐलाण कर दियो ज्यो है।