प्रदेशभर मांय सोमवार ने रित मुजब सिरधा भाव ऊं गणगौर रो तिवांर मनायो जावे। होळी ऊं सरू व्ह्यो ईसर गणगौर रा पूजन रो सिलसिलो आज पूरो व्ह्यो। पूजा रे पछे तळाब, सरोवरां अर बावड़ियां मांय मंगल गीतां रे साथे गणगौर मूरता रो विसर्जन करी ज्यो। सुख अर सौभाग्य ऊं जुड़्या लोकपर्व माथे राजधानी जयपुर मांय आज गणगौर री रित मुजब शाही सवारी निकाळी जावे। उठिने उदयपुर मांय गणगौर फेस्टिवल मनायो जावे। ओ उत्सव तीन दिन तांई चालेला। गणगौर घाट माथे ईसर-पार्वती री पूजा-अर्चना करी जावे। सिंज्यां घंटाघर ऊं गणगौर घाट तांई गणगौर री सवारी निकाळी जायेला। इण रे पछे सांस्कृतिक कार्यक्रम व्हेला। जोधपुर मांय ई गणगौर रो तिवांर धूमधाम ऊं मनायो जावे। पोकरण मांय आज गणगौर पर्व माथे मेळो भरीजे। झालावाड़ मांय ई गणगौर रो तिवांर रीत मुजब उमाव रे साथे मनायी ज्यो। पाली मांय गणगौर मेळो भरीजे। दौसा मांय नगर परिषद कानी ऊं गणगौर री सवारी निकाळी ज्यी जो खास मार्गां ऊं व्हे र निकळी। राज्य रा भरतपुर, बाडमेर, बारां, चूरू, सवाईमाधोपुर अर हनुमानगढ़ जिलां मांय ई गणगौर रो तिवांर सिरधा अर हरक रे साथे मनायो जावे।