प्रदेशभर मांय शुक्रवार ने रंगां रो तिवांर होळी उमाव रे साथे मनायो जावे। संवारा ऊं ई टाबर, महिलावां अर बुजुर्ग एक-दूजा रे रंग गुलाल लगा र होळी री शुभकामनावां दे रीया है। धुलण्डी रे मौके मिन्दरां मांय ई भजन-कीर्तन अर रंगोत्सव रा आयोजनां मांय दर्शनार्थियां री भीड़ निजर आई। करौली रा नामी मदन मोहन मिन्दर अर चित्तौड़गढ़ रा सांवलिया जी मिन्दर मांय ई घणी तादाद मांय सिरधालू पूग्या। राजधानी जयपुर मांय ई होळी रो उमाव निजर आयो। शहर रा गोविन्द देव जी मिंदर मांय घणी तादाद मांय जुट्या सिरधालूआं आप रा आराध्य रा दर्शन कर ने फागोत्सव मांय शिरकत करी। वठे ई होटल खासाकोठी मांय विदेशी सैलाणियां सारू खास होळी जळसो आयोजित करी ज्यो। ई कार्यक्रम मांय सैलाणियां लोक कलाकारां री प्रस्तुतियां रे साथे होळी रो आनंद लियो। राजभवन मांय होळी रो तिवार हरक रे साथै मनायी ज्यो। ढोल अर चंग री थाप माथे लोक कलाकारां शानदार प्रस्तुतियां दी। राज्यपाल हरिभाऊ बागडे़ मेहमानां रे गुलाल लगा र मान कर्यो अर होळी री शुभकामनावां दी। मुख्यमंत्री भजनलाल शर्मा रा जयपुर रहवास माथे रंगोत्सव कार्यक्रम व्ह्यो । ई मौके समाज रा न्यारा न्यारा तबकां रा लोगां मुख्यमंत्री रे गुलाल लेगा र शुभकामनावां दी। श्री शर्मा ई दौरान घणी तादाद मांय लोगां रे साथे प्राकृतिक रंगा अर फूलां ऊं होळी खेली। मुख्यमंत्री लोगां ऊं बेर ने भुला र होळी रा रंगां मांय सराबोर होवण री अरज करी। ई मौके लोक कलाकारां मोवणी प्रस्तुतियां ऊं ब्रज री संस्कृति ने साकार कर दिया।लोकसभा अध्यक्ष ओम बिरला शुक्रवार ने होळी रो तिवार कोटा मांय मनायो। मीडिया ऊं बतळ मांय वणा होळी माथे सामजिक समरसता रो संदेश दियो। पैली रा मुख्यमंत्री अशोक गहलोत जयपुर मांय आप रा रहवास माथे लोगां ऊं मिल्या अर होळी री शुभकामनावां दी। चूरू मांय होळी रो तिवार हरक रे साथे मनायी ज्यो। झुन्झुनू मांय धुलण्डी रे मौके खैमी शक्ति मिंदर मांय फूलां री होळी खेली ज्यी। वठे ई मण्डावा मांय घणी तादाद मांय विदेशी सैलाणियां लोक गीतां अर विदेशी धुनां माथे जम ने नाच कर्यो। झालावाड़ा जिला मांय ई होळी रो तिवार रीत मुजब उमाव रे साथे मनायी ज्यो। झालरापाटन मांय द्वारिकाधीश मिन्दर मांय ं फागोत्सव रे दौरान भक्तां भगवान श्री कृष्ण रे साथे होळी खेली। स्वर्ण नगरी जैसलमेर मांय धुलण्डी रे मौके सोनार दुर्ग रा लक्ष्मीनारायण मिन्दर मांय फागोत्सव रो आयोजन व्ह्यो। सोनार किला रा व्यास मोहल्ला मांय बादशाह अर शहजाता री सावारी निकाळी ज्यी। पाली मांय सांसद मदन राठौड़ वठा रा लोगां रे साथे होळी खेली अर शुभकामनावां दी। राजसमंद ज़िला रा श्रीनाथ जी मिन्दर मांय डोलोत्सव मनायी ज्यो अर अबीर गुलाल उड़ाई ज्यी। सवाईमाधोपुर जिला मांय रणथम्भौर रोड़ रा होटलां मांय सांस्कृतिक अर रंगारंग कार्यक्रमां रो आयोजन करी ज्यो। भीलवाड़ा जिला रा शाहपुरा मांय सोमवार ने रामस्नेही सम्प्रदाय रो सालाना फूलडोल महोत्वस सरू व्ह्यो। ओ महोत्सव उन्नीस मार्च तांई चालेला। राष्ट्रपति द्रौपदी मुर्मू अर उपराष्ट्रपति जगदीप धनखड़ देशवासियां ने होळी री शुभकामनावां देवता ई तिवांर ने एकता रा रंग ने मजबूत करण वाळो बताया है। प्रधानमंत्री नरेन्द्र मोदी आप रा बधाई संदेश मांय होळी रा पवित्र पर्व ने नुवी ऊर्जा रो संचार करण वाळो बताया है। होळी अर रमजान रा जुम्मो एक ई दिन पड़ण रे कारण प्रशासन पूरी तरह सावचेत है। प्रदेशभर मांय होळी ने ले र हिफाजत रा करड़ा बन्दोवन्त करी ज्या है, संवेदनशील हलका मांय सीसीटीवी ऊं निगे राख्यी जावे। प्रदेशभर मांय काले पुलिसकर्मी होळी खेलेला।