प्रदेशभर मांय गुरूवार ने रात शुभ मुहुर्त मांय सिरधाभाव सागे होळी मंगळायी जावेला। इंर् सारू न्यारी-न्यारी ठौड़ां होलिका सजाई ज्यी है। ईं सागे ई न्यारा-न्यारा मिन्दरां मांय फूल बंगला समेत खास झांकियां सजायी ज्यी है। जयपुर रा गोविंद देवजी मिन्दर मांय खास धार्मिक कार्यक्रम राख्या जा रह्या है। जैसलमेर मांय लोक देवता बाबा रामदेव री समाधि ने फूलां ऊं सजायी ज्यी है। होळी रे मौके बाजारां मांय मिठाइयां, रंग, अबीर अर गुलाल री दुकानां माथे मोटी तादाद मांय लोग खरीददारी करता निजर आ रह्या है। मुख्यमंत्री भजनलाल शर्मा गुरूवार ने जयपुर रा सांगानेर मांय भारतीय जनता पार्टी री ओर ऊं राख्यी ज्या होळी मिलन समारोह मांय सिरकत कीनी। इण ऊं पैली वे आज संवारे डीग ज़िला मांय पूंछरी का लौठा रा श्रीनाथ जी मिन्दर मांय पूजा-अर्चना कर र प्रदेश मांय खुशहाली री कामना कीनी। मुख्यमंत्री भजन लाल शर्मा अर गृह राज्यमंत्री जवाहर सिंह बेढम लोगां सागे फूलां री होळी खेली। काल धुलंडी रे मौके रंग खेल्यो जावेला। प्रदेश रा न्यारा-न्यारा हलकां मांय अनूठा अंदाज मांय होळी खेली जावे है। जैसलमेर मांय सीमा सुरक्षा बल-बीएसएफ रा जवान एक-दूजा रे रंग लगा र होळी मणाई। इंर् बीचे, राज्य मांय सैर-सपाटा री ठौड़ां मोटी तादाद मांय सैलाणी पूग रह्या है। धुलंडी रे मौके होटलां मांय सैलाणियां सारू कुदरती रंगां अर हर्बल गुलाल सागे रेन डांस अर संगीत रा खास इंतजाम करी ज्या है। पाली जिला रा जवाई अर रणकपुर मांय इंग्लैंड, फ्रांस, ऑस्ट्रेलिया अर जर्मनी समेत न्यारा-न्यारा देशां री घुड़सवार महिलावां रो दल मारवाड़ अर गोडवाड़ हलका री परम्परागत होळी खेलण सारु आयो है। म्हाणा सवाईमाधोपुर खबरनवीस बतायो के रणथम्भौर राष्ट्रीय उद्यान अर चम्बल घड़ियाल सेंक्चुरी ने निरखण सारू ई सैलाणी पूग्या है। होळी ने ध्यान राखता थकां प्रदेश मांय हिफ़ाजत रा खास इन्तजामात् करी ज्या है। पुलिस रा अहलकार अर जवान पूरी सावचेती राख रह्या है। राजधानी जयपुर मांय अभय कमांड सेंटर ऊं पूरा शहर री निगराणी राख्यी जावेला। ड्रोन कैमरां री मदद ऊं निजर राख्यी जावेला। होळी रा त्यौहार रे मौके खाद्य विभाग री टीमां खाण-पीण री चीजां मांय मिलावट करण वाळां रे खिलाफ कार्यवाही कर रही है।