जैन धर्म रा 24 वां तीर्थंकर भगवान महावीर री जयंती गुरूवार ने श्रिद्धा अर उच्चास रे साथे मनायी जा री है। इण मौके माथे जैन मिन्दरां मांय खास आयोजन राख्या ग्या है। प्रभात फेरियां निकाळ र भगवान रो अभिषेक कर्यो जा रह्यो है। करौली ज़िले रा श्रीमहावीर जी मांय मेळो परवान माथे है। वार्षिक मेळा मांय देशभर सूं श्रिद्धालु पंहुच्या है। इण मौके माथे जैसलमेर मांय भव्य शोभा जात्रा निकाळीजी। वठिने, जोधपुर मांय निकाळीजी शोभाजात्रा मांय ईको फ्रेंडली झांकियां आकर्षण रो केन्द्र री। दौसा रा आदिनाथ जैन मिन्दर सूं निकळी शोभायात्रा रो जगह-जगह फूलां री बिरखा कर स्वागत कर्यो गयो। करौली जिले रा प्रसिद्ध श्रीमहावीर जी मांय जनकल्याण महोत्सव माथे न्यारा-न्यारा कार्यक्रम राख्या जा रह्या। चित्तौडगढ मांय भी महावीर जयंती माथे शोभायात्रा निकाळी ज्यी इण मौके सासंद सी पी जोशी अर केई जनप्रतिनिधि मौजूद रह्या। झुंझुनूं मांय भी महावीर जयंती रे मौका माथे जैन मन्दिरां मांय खास आयोजन व्ह्या अर प्रभात फेरी निकाळीजी। पाली मांय सुवांरे भगवान महावीर रे अभिषेक रे पाछे शहर रा खास गेला सूं शोभाजात्रा निकाळीजी। अजमेर मांय केसरगंज सूं निकली शोभाजात्रा मांय स्वर्ण रथ साथै 13 रथ अर चालीस झांकियां आकर्षण रो केन्द्र री। पैली बार 41 साधु साधवियां रो संघ आचार्य वसुनंदी महाराज रा सानिध्य मांय शोभाजात्रा मांय भेळो व्ह्यो। झालावाड, सलूंबर, बाड़मेर अर बारां मांय भी शोभाजात्रा निकाळी ज्यी।