पैली रा प्रधानमंत्री राजीव गांधी री जयंती आज देशभर मांय सद्भावना दिवस रा रूप मांय मनायी गई। प्रधानमंत्री नरेंद्र मोदी आज पैली रा प्रधानमंत्री राजीव गांधी ने वां री जयंती रे मौके श्रद्धाजंलि दी। लोकसभा मांय विपक्ष रा नेता अर कांग्रेस सांसद राहुल गांधी नई दिल्ली मांय वीर भूमि जा र पैली रा प्रधानमंत्री राजीव गांधी रे फूल चढ़ाया। अठीने प्रदेश रा न्यारा-न्यारा जिला मांय भी पैली रा प्रधानमंत्री राजीव गांधी री जयंती माथे श्रद्धाजंलि कार्यक्रम व्ह्या। पाली मांय कांग्रेस कार्यकर्ता वां री तस्वीर माथे फूल चढा र श्रद्धाजंलि दी। जिला कांग्रेस कमेटी दौसा री कानी ऊं कांग्रेस कार्यालय मांय भारत रत्न श्री गांधी री जयंती माथे कार्यकर्ता वां रा छायाचित्र माथे फूल चढाया। हनुमानगढ़ टाउन मांय ‘राजीव गांधी के दर्शन’ विषय माथे संगोष्ठी राख्यी गई। शाहपुरा मांय न्यारा-न्यारा संगठनां री कानी ऊं श्रद्धाजंलि सभा समेत केई कार्यक्रम राख्या गया। बीकानेर मांय राजीव गांधी री जयंती माथे शहर अर देहात जिला कांग्रेस कमेटी री कानी ऊं सभा करर फूल चढाया गया। भरतपुर मांय इण दिन ने सदभावना दिवस रा रूप मांय मनायो गयो। कांग्रेस कमेटी री कानी ऊं राख्या कार्यक्रम मांय वां रा चित्र माथे फूल चढा र याद कर्यो गयो।