पांच दिन रा त्यौहार दीवाळी रा तहत बुधवार ने छोटी दीवाळी मनायी जा रही है। इण ने रूप चौदस अर नरक चौदस रा तौर ऊं जाणी जावे है। बुधवार ने न्यारी-न्यारी ठौड़ां जातरू तळावां मांय पवित्र स्नान कर र धन, धान्य अर सुख-समृद्धि री कामना कीनी। बुधवार ने रूप चौदस रे मौके पाली मांय महिलावां हाथां माथे मेहंदी लगवायी। दीवाळी रे मौके मिंदरां, बाजारां अर कारोबारी प्रतिष्ठानां मांय रंग-बिरंगा सजावटी सामान, दीयां अर एलईडी लाइटां री जगमगाहट घणी सोहवणी निजर आ रही है। केई ठौड़ां परम्परागत रंगोली अर मांडणा ई माण्डी ज्या है। दीवाळी रा त्यौहार रे मौके बाजारां मांय रंग-बिरंगी झालरां अर लाइटां सागे न्यारी-न्यारी थीम माथे सजावट करी ज्यी है। दीवाळी रा त्यौहार ने ध्यान राखता थकां जयपुर शहर मांय बुधवार ऊं 2 नवम्बर तांई आवण-जावण री व्यवस्था मांय बदलाव करी ज्यो है। पाली मांय देवस्थान विभाग रा सोमनाथ महादेव मिंदर मांय खास सजावट सागे आरती, अन्नकूट उत्सव अर खास कार्यक्रम राख्या जा रह्या है। देवस्थान विभाग मिंदर मांय सोहवणी रोशनी ऊं सजावट करण अर अन्नकूट उत्सव रीत रे मुजब मनावण रा हुकम दीना है। जैसलमेर मांय लोकदेवता बाबा रामदेव रा िंमंदर मांय भांत-भांत रा फूलां ऊं सजावट करी ज्यी है। सीमा सुरक्षा बल-बीएसएफ री ओर ऊं सरहद रा पहरेदारां अर वां रा पिरवार वाळां सारू दीवाळी मेळो लगायो जा रह्यो है। भरतपुर मांय बुधवार ने दीपावली महोत्सव रा तहत जिला प्रशासन री ओर ऊं सुजान गंगा नहर माथे दीपदान रो कार्यक्रम राख्यी ज्यो।सिरोही जिला रा माउंट आबू मांय पड़ौसी राज्य गुजरात सागे ही देश रा न्यारा-न्यारा हलकां ऊं सैलाणी दीवाळी मणावण सारू आ रह्या है। लोक सभा अध्यक्ष ओम बिरला, राज्यपाल हरिभाऊ बागड़े अर मुख्यमंत्री भजनलाल शर्मा जनता ने दीवाळी अर आवता पर्व-त्यौहारां री शुभकामनावां दीनी है। राज्यपाल दीवाळी, गोवर्धन पूजा अर भैया दूज रा सिलसिला मांय शुभकामना संदेश देता थकां कह्यो के ओ त्यौहार अन्धारा माथे रोशनी री जीत री निशाणी है। मुख्यमंत्री वां रा संदेश मांय कह्यो के दीयां रो ओ त्यौहार अन्याय अर शोषण रे खिलाफ न्याय अर संघर्ष री जीत रो उत्सव है। मुख्यमंत्री जनता ऊं भगवान श्रीराम रा आदर्शां ने जिन्दगी मांय उतार र बेसहारा लोगां री मदद करण रो संकल्प लेवण री अपीली कीनी। न्यारा-न्यारा ज़िलां रा कलेक्टर ई जनता ने दीवाळी री शुभकामनावां देता थकां त्यौहारां रे मौके भाईचारो बणायो राखण री अपील कीनी है। हनुमानगढ रा जिला कलेक्टर कानाराम इंर् मौके लोगां ऊं नशो नी करण री अपील करता थकां मुख्यमंत्री आरोग्य योजना मांय नाम मण्डावण री अपील कीनी। चूरू रा ज़िला कलेक्टर अभिषेक सुराणा जनता ऊं गारा रा दीया अर स्थानीय कारीगरां कानी ऊं बणायी ज्या सामान री खरीदी री अपील कीनी। दीवाली विद माय भारत री पहली वर्षगांठ रे मौके ई प्रदेश मांय न्यारा-न्यारा कार्यक्रम राख्या जा रह्या है। सवाईमाधोपुर मांय नेहरू युवा केंद्र अर कन्फेडरेशन ऑफ़ ऑल इंडिया ट्रेडर्स री ओर ऊं महावीर पार्क, अंबेडकर सर्किल अर सब्जी मंडी चौराहा रे आरे-सारे नौजवान श्रमदान कीनो। ईं मौके साफ़-सफ़ाई रा बारा मांय जाग जगायी ज्यी अर लोगां ने शपथ दिरायी ज्यी। पुलिस महानिदेशक उत्कल रंजन साहू दीवाळी रे मौके पुलिस री ओर ऊं जनता री ज़िंदगी मांय खुशहाली अर समृद्धि री मंगलकामना कीनी है। डी.जी.पी. वां रा संदेश मांय कह्यो के राजस्थान पुलिस प्रदेश मांय शांति अर कानून-व्यवस्था बणायी राखण, अपराधां माथे काबू करण अर जनता री हिफाजत सारू सगळा जरूरी जतन कर रही है। सवाईमाधोपुर री एस.पी. ममता गुप्ता ई जनता ने दीवाळी री शुभकामनावां देता थकां सांप्रदायिक सौहार्द बणायो राखण अर प्रदूषणमुक्त ग्रीन आतिशबाजी करण री अपील कीनी है।