पहलो राष्ट्रीय अंतरिक्ष दिवस शुक्रवार ने मनायो जावेला। लारला साल 23 अगस्त ने ही चंद्रयान-3 मिशन रो लैंडर विक्रम चांद री सतह माथे कामयाबी सागे उतर्यो हो। राष्ट्रीय अंतरिक्ष दिवस रो ईं साल रो मुद्दो है-चंद्रमा को छूते हुए जीवन को छूनाः भारत की अंतरिक्ष गाथा। प्रदेश मांय ई ईं सिलसिला मांय न्यारा-न्यारा कार्यक्रम राख्या जा रह्या है। काल मनाया जावण वाळा “राष्ट्रीय अन्तरिक्ष दिवस” रा सिलसिला मांय केन्द्रीय संचार ब्यूरो री ओर ऊं जयपुर रा जवाहर कला केंद्र मांय तीन दिन री चित्र प्रदर्शनी लगायी जा रही है। इण रो उद्घाटन आज जयपुर री सांसद मंजू शर्मा कीनो। इंर् मौके वे कह्यो के काल मनायो जावण वाळो पहलो राष्ट्रीय अन्तरिक्ष दिवस लारला साल अन्तरिक्ष रा हलका मांय हासिल करी ज्यी खास उपलब्धि रो मान करण रो दिन है। ईं मौके केन्द्रीय संचार ब्यूरो अर पत्र सूचना कार्यालय जयपुर री अपर महानिदेशक ऋतु शुक्ला कह्यो के राष्ट्रीय अन्तरिक्ष दिवस देश रा अन्तरिक्ष अन्वेषण इतिहास मांय खास मुकाम है। शुक्ला बतायो के ईं चित्र प्रदर्शनी मांय चंद्रयान-3 मिशन री कामयाबी सागे अन्तरिक्ष प्रौद्योगिकी मांय भारत रा बधता बूता, उपलब्धियां अर नवाचारां रो दरसाव करी ज्यो है। वे कह्यो के आ चित्र प्रदर्शनी नुवी पीढ़ी ने अन्तरिक्ष विज्ञान अर तकनीक रा हलका ऊं जोड़बा रो काम करेला। 24 अगस्त तांई चालण वाळी तीन दिन री ईं चित्र प्रदर्शनी मांय अन्तरिक्ष विज्ञान अर प्रौद्योगिकी रा हलका मांय भारत री खास उपलब्धियां रो दरसाव कर्यो जा रह्यो है। राष्ट्रीय अंतरिक्ष दिवस री पैली वाळी सांझ आज जोधपुर मांय सूचना अर प्रसारण मंत्रालय रा केंद्रीय संचार ब्यूरो री ओर ऊं एक गैर सरकारी स्कूल मांय विचार गोष्ठी राख्यी ज्यी। शिक्षा विभाग ई प्रदेश री सगळी स्कूलां मांय काल राष्ट्रीय अन्तरिक्ष दिवस मनावण रा हुकम दीना है। स्कूलां मांय राष्ट्रीय अंतरिक्ष दिवस रे मौके कार्यशालावां, व्याख्यान अर प्रदर्शनी समेत न्यारा-न्यारा आयोजन राख्या जावेला।