नौरता रा दूजा दिन शुक्रवार ने ई आखा राज्य मांय न्यारा-न्यारा कार्यक्रम राख्या जा रह्या है। नीमकाथाना जिला मांय उदयपुरवाटी रा शाकंभरी शक्तिपीठ मांय मोटी तादाद मांय जातरू पूग रह्या है। शाकंभरी शक्तिपीठ हलका मांय नौ दिन रो मेळो भर रह्यो है। केकड़ी ज़िला मांय बघेरा री शक्तिपीठ ब्रह्माणी माताजी रा चतुर्भुज रूप रा सोहवणा रूप श्रंगार ने निरखण सारू दूर-दराज ऊं मोकळा जातरू पूग रह्या है। डीग जिला रा मिंदरां मांय ई मां दुर्गा रो खास श्रृंगार अर पूजा-अर्चना करी जा रही है। शहर रा ऐतिहासिक लक्ष्मण मंदिर सामी रामलीला महोत्सव ई चाल रह्यो है। पाली ज़िला मांय नाडोल रा आशापुरा माता मिंदर मांय संवारे ऊं ई मोटी तादाद मांय जातरू पूग रह्या है। भरतपुर मांय पॉलिथीन काम नी लेवण बाबत् जाग जगावण सारू शुक्रवार न रैली निकाळी ज्यी। ईं दौरान सड़क माथे पड़्यो कचरो अर पॉलिथीन री थैलियां भेळी करी ज्यी। रैली रे दौरान भरतपुर ने साफ अर पॉलीथिन मुक्त बणावण री शपथ ई दिरायी ज्यी।