बुधवार ने नुवा साल रो पैलो दिन उमाव, ऊर्जा अर हरख सागे मणायी ज्यो। लोग मिंदिरां अर धार्मिक ठौड़ां दर्शन कर र नुवा साल रो स्वागत कीनो। मिंदरां मांय मोटी तादाद मांय जातरू पूग्या। राजधानी जयपुर मांय मोती डूंगरी रा गणेश मिन्दर अर गोविंद देव जी मिन्दर समेत न्यारा-न्यारा मिन्दरां मांय जातरू दर्शन कर र पूजा-अर्चना कीनी। म्हाणा खबरनवीस बतायो के मुख्यमंत्री भजनलाल शर्मा ई मोती डूंगरी मिन्दर मांय दर्शन कर र जनता री खुशहाली री कामना कीनी। इण ऊं पैली मुख्यमंत्री बुधवार ने डीग जिला रा पूंछरी का लौठा मांय श्रीनाथ जी रो अभिषेक कीनो। वे अहलकारां ने मिन्दर मांय सुबीता और बधावण सारू ज़रूरी हुकम दीना। चूरू ज़िला रा सालासर बालाजी मिन्दर मांय आरे-सारे रा राज्यां ऊं ई जातरू पूग्या। रणथम्भौर रा त्रिनैत्र गणेश मिन्दर मांय ई मोटी तादाद मांय जातरू पूग्या। चौथ का बरवाड़ा रा चौथ माता मिन्दर मांय ई मोटी तादाद मांय जातरू दर्शन कीना। जैसलमेर ज़िला रा तनोट माता मिन्दर मांय करी ज्यी खास आरती मांय बीएसएफ रा अहलकार, जवान अर दूजा जातरू मौजूद रह्या। राजसमंद ज़िला रा श्रीनाथ जी मिन्दर अर सीकर ज़िला रा खाटूश्यामजी अर जीण माता मिंदर मांय ई मोटी तादाद मांय लोग दर्शन सारू पूग्या। करौली ज़िला रा कैलादेवी अर मदनमोहन जी मिन्दर मांय ई दूर-दराज ऊं लोग आराधना सारू पूग्या। चित्तौड़गढ़ ज़िला रा सांवलियाजी मिन्दर मांय बुधवार ने रिकॉर्ड तादाद मांय जातरू पूग्या। म्हाणा खबरनवीस बतायो के संवारे पांच बज्यां व्ही मंगला आरती मांय ई जातरूआं री लम्बी लेणां निजर आई। जातरूआं री मोटी तादाद ने ध्यान राखता थकां प्रशासन अर पुलिस री ओर ऊं हिफाजत अर आवण-जावण रा खास इंतजामात करी ज्या। केई लोग ज़रूरतमंद लोगां ने ज़रूरी चीजां दान कर र नुवा साल री सरूआत कीनी। अजमेर मांय सीआरपीएफ री ओर ऊं जवाहर लाल नेहरू अस्पताल मांय मरीज़ां ने कम्बल दिया ज्या। बुधवार ने नुवा साल री सरूआत रे मौके राज्यपाल हरिभाऊ बागडे़ ऊं मुलाकात सारू ई मोटी तादाद मांय आम अर खास लोग पूग्या। राज्यपाल सगळां ने बधाई देता थकां मंगल कामना कीनी। लोकायुक्त प्रताप कृष्ण लोहरा ई राज्यपाल ऊं मुलाकात कर र वां ने प्रदेश रो 36वों वार्षिक प्रतिवेदन सूंप्यो।