नीट परीक्षा पेपर लीक मामला मांय नौजवानां कानी ऊँ चलायी ज्यो आन्दोलन खत्म व्हेवण रो ऐलाण कर दियो ज्यो है। नई दिल्ली मांय थावर ने खबरनवीसां सागे बातचीत रे दौरान काॅकरोच जनता पार्टी-सी.जे.पी. रा प्रवक्ता आशुतोष रांका कह्यो के सरकार वां री मांगां मान लीनी है। रांका बतायो के प्रदर्शन करण वाळां रे खिलाफ़ कोई कार्रवाही नी करण अर पीड़ित पिरवारां ने मुआवज़ो देवण माथे सरकार सागे एकराय बण ग्यी है।
इण ऊँ पैली केन्द्र सरकार अर काॅकरोच जनता पार्टी रा नुमाइन्दां बीचे थावर ने नई दिल्ली मांय तीजा दौर री मीटिंग व्ही। केन्द्रीय मंत्री जे. पी. नड्डा अर डाॅ. जितेन्द्र सिंह सी.जे.पी. रा प्रवक्ता सौरव दास अर आशुतोष रांका सागे लम्बी बातचीत कीनी। ईं पाछे सीजेपी आंदोलन खत्म करण रो ऐलाण करता थकां प्रदर्शन करण वाळां ऊँ पाछा लौट जावण री अरज कीनी। श्री नड्डा खबरनवीसां ने बतायो के नीट पेपर लीक मामला मांय प्रदर्शन करण वाळा रे खिलाफ कोई कार्यवाही नी करी जावेला। वे कह्यो के नीट पेपर लीक रा पीड़ित पिरवारां रा प्रति सरकार री पूरी सहानुभूति है अर वां ने नियमां रे मुताबिक मुआवज़ो दियो जावेला। नड्डा कह्यो के शिक्षा व्यवस्था मांय सुधारां रा बारा मांय ई विचार कर्यो जावेला।