नामचीन विचारक पंडित दीनदयाल उपाध्याय ने मंगलवार ने वां री 57वीं बरसी रे मौके सिरधाभाव सागे याद करी ज्या । पंडित दीनदयाल उपाध्याय 1953 ऊं 1968 तांई भारतीय जनसंघ रा नेता रह्या। ईं मौके जयपुर कने धानक्या मांय दीनदयाल उपाध्याय राष्ट्रीय स्मारक स्थल माथे पुष्पाजंलि अर प्रार्थना सभा राख्यी ज्यी। कार्यक्रम मांय मुख्यमंत्री भजनलाल शर्मा अर उप मुख्यमंत्री दीया कुमारी ई सिरकत कीनी। कार्यक्रम मांय पंडित दीनदयाल उपाध्याय स्मृति समारोह समिति रा अध्यक्ष प्रो. मोहन लाल छीपा कह्यो के पंडित दीनदयाल उपाध्याय ऊं जुड़ी ठोड़ां रो विकास कर्यो जावणो चाहिजे। ईं मौके विधानसभा अध्यक्ष वासुदेव देवनानी सिविल लाइंस रा विधायक गोपाल शर्मा सागे आंख्यां री जांच रा शिविर रो उद्घाटन कीनो। पाली मांय राख्यी ज्या कार्यक्रम मांय जिला रा प्रभारी अर स्वायत्त शासन मंत्री झाबर सिंह खर्रा ई सिरकत कीनी। ज़िला मांय पं. उपाध्याय रा सुशासन ऊं जुड़्या विचारां अर नीतियां रा बारा मांय संगोष्ठियां राख्यी ज्यी। सवाईमाधोपुर मांय ई पंडित उपाध्याय रा फोटो माथे फूल चढ़ा र वां ने याद करी ज्या। प्रधानमंत्री नरेंद्र मोदी सोशल मीडिया रे जरिये दिया ज्या संदेश मांय पंडित दीनदयाल उपाध्याय ने दूर री सोच वाळा विचारक बताया। वे कह्यो के समाज रा आखिरी छोर माथे बैठ्या लोगां रा भला री पंडित दीनदयाल उपाध्याय री सोच मज़बूत देश बणावण री प्रेरणा देवे है।