नामचीन विचारक पंडित दीनदयाल उपाध्याय री जयंती रे मौके बुधवार ने वां ने सिरधा भाव सागे याद कर्या जा रह्या है। प्रधानमंत्री नरेंद्र मोदी, गृह मंत्री अमित शाह अर रक्षा मंत्री राजनाथ सिंह पंडित उपाध्याय ने सिरधा भाव सागे याद कीना। प्रधानमंत्री सोशल मीडिया पोस्ट रे जरिये कह्यो के महान राष्ट्रवादी विचारक पंडित दीनदयाल उपाध्याय री अन्त्योदय री सोच, विकसित भारत रो संकल्प सांचो करण मांय खास काम करेला। ईं मौके प्रदेश मांय ई न्यारा-न्यारा कार्यक्रम राख्यी ज्या। उपराष्ट्रपति जगदीप धनखड़ सीकर रा पंडित दीनदयाल उपाध्याय शेखावाटी विश्वविद्यालय मांय पंडित उपाध्याय री मूरत रो अनावरण कीनो। राज्यपाल हरिभाऊ बागड़े अर उपमुख्यमंत्री डॉ प्रेमचंद बैरवा ई जळसा मांय सिरकत कीनी। राज्यपाल हरिभाऊ बागडे़ जयपुर कने धानक्या मांय पंडित दीनदयाल उपाध्याय रा राष्ट्रीय स्मारक माथे सिरधा रा फूल चढ़ाया अर पंडित उपाध्याय री ज़िन्दगी ऊं जुड़्या संग्रहालय ने देख्यो। इंर् मौके राज्यपाल कह्यो के पंडित दीनदयाल उपाध्याय एकात्म मानववाद री सोच सागे अंत्योदय रा विचार अर सीख ऊं जनता रा भला सारू प्रेरणा दीनी। कार्यक्रम मांय राजस्थान धरोहर बोर्ड रा अध्यक्ष ओंकार सिंह लखावत पंडित दीनदयाल उपाध्याय री जिन्दगी रा बारा मांय विचार बताया। मुख्यमंत्री भजनलाल शर्मा ई वां रा रहवास माथे पंडित दीनदयाल उपाध्याय ने वां री 108वीं जयंती रे मौके फूल चढ़ा र याद कीना। जैसलमेर मांय भाजपा रा जिला कार्यालय मांय राख्यी ज्या कार्यक्रम मांय पंडित दीन दयाल उपाध्याय ने सिरधा भाव सागे याद करी ज्या। ईं मौके पाली रा मोक्षधाम मांय खुद सेवक साफ-सफाई कीनी।