देश सोमवार ने संविधान निर्माता बाबा साहेब डॉक्टर भीमराव आंबेडकर री 134 वीं जयंती रे मौके वां ने सिरधा रे साथै याद करे। राष्ट्रपति द्रौपदी मुर्मू, उपराष्ट्रपति जगदीप धनखड, प्रधानमंत्री नरेन्द्र मोदी, लोकसभा अध्यक्ष ओम बिरला, विपख रा नेता राहुल गांधी अर केन्द्रीय मंत्रियां अर संसद सदस्यां संसद भवन परिसर मांय डॉक्टर आंबेडकर री मूरत माथे पुष्प अर्पण कर्या। अठिने, प्रदेश मांय ई जयपुर समेत न्यारी-न्यारी ठौड़ां आंबेडकर जयंती माथे जळसा आयोजित कर ने वां ने याद करी ज्या। ज़िला मुख्यालयां माथे पुष्पांजलि, संगोष्ठी, प्रभात फेरी अर समरसता रैली रे साथै ई न्यारा-न्यारा कार्यक्रम व्हे रह्या है। राज्य थर रो कार्यक्रम राजधानी जयपुर रा राजस्थान इंटरनेशन सेंटर मांय राख्यो ज्यो। कार्यक्रम मांय मुख्यमंत्री भजनलाल शर्मा कह्यो के बाबा साहेब देश ई नी बल्कि आखी दुनिया ने मार्ग दिखायो है। वणा कह्यो के आखिरी छेड़ा माथे बैठ्या मिनख ने ऊपर लावण सारू बाब साहेब जो सपनो देख्यो हो उण ने पूरो करण सारू सरकार प्रतिबद्ध है। ई मौके मुख्यमंत्री खास तबका अर वंचितां ने न्यारी-न्यारी सौगाता दी। आ मांय, एससी एसटी उद्यमियां ने औद्योगिक भूखंड, सफाई कर्मचारियां सारू एक मुश्त समझौता योजना अर नशा मुक्ति केन्द्रां री सरूआत भेळी है। ई दौरान मुख्यमंत्री अम्बेडकर पंचतीर्थ योजना री बस ने हरी झंडी दिखाई अर ई साल रा बजट एलाण मांय संचालित मुख्यमंत्री आयुष्मान बाल संबल योजना री पैली मंजूरी ई जारी करी। श्री शर्मा दिव्यांगजन सारू सहायक उपकरण बाट्या अर स्वच्छकारां ने सहायक सेफ्टी किट दिया। कार्यक्रम मांय उपमुख्यमंत्री डॉ. प्रेमचंद बैरवा, सामजिक न्याय अर अधिकारिता मंत्री अविनाश गहलोत, विधि मंत्री जोगाराम पटेल, सांसद मंजू शर्मा समेत केई जन नुमाईन्दा अर जान्या मान्या लोग मौजूद रह्या। इण ऊं पैला राज्यपाल हरिभाऊ बागडे़ अर मुख्यमंत्री भजन लाल शर्मा जयपुर रा अम्बेडकर सर्किल माथे बाबा साहेब री मूरत माथे पुष्पांजलि अर्पण करी। ई मौके संवारा जयपुर रा अल्बर्ट हॉल ऊं रन फॉर इक्वलिटी मैराथन व्ही। इण मांय उपमुख्यमंत्री डॉ. प्रेमचंद बैरवा समेत घणी तादाद मांय शहर वासी भेळा व्ह्या। जयपुर मांय प्रदेश कांग्रेस दफ़्तर मांय सोमवार ने डॉ. भीमराव आम्बेडकर ने सिरधाजली दीरीजी। ई मौके बाबा साहेब डॉ. भीमराव आम्बेडकर रा योगदान मुद्दा माथे संगोष्ठी व्ही, जिण मांय प्रदेश कांग्रेस कमेटी रा अध्यक्ष गोविन्द सिंह डोटासरा, नेता विपख टीकाराम जूली समेत केई विधायक अर कांग्रेस कार्यकर्ता भेळा व्ह्या। जोधपुर मांय नागौरी गेट माथे डॉ. भीमराव आम्बेड़कर री मूरत माथे पुष्पाजंलि कार्यक्रम आयोजित व्ह्यो। केंद्रीय संस्कृति अर पर्यटन मंत्री गजेंद्र सिंह शेखावत पुष्प अर्पण कर ने बाबा साहेब ने श्रद्धाजंलि दी। वणा कह्यो के बाबा साहेब भारतीयां रे बीचे समानता री एक ऐडी मसाल जगाई है, जिण रो उजास युग-युग तांई है। ईं मौके भाजपा प्रदेशाध्यक्ष मदन राठौड़, सांसद राजेन्द्र गहलोत समेत केई जन नुमाईन्दा अर आमजन मौजूद रह्या। अलवर मांय केंद्रीय मंत्री भूपेंद्र यादव आंबेडकर री मूरत माथे माळा पहरार स्मारिका रो विमोचन कर्यो। बाड़मेर मांय अंबेडकर सर्किल माथे बाबा साहब री आदमकद मूरत माथे फूल अरपण करी ज्या। वठे ई ईं मौके जनजागरूकता रैली अर विचार गोष्ठी रो आयोजन करी ज्यो। श्रीगंगानगर, चूरू, झालावाड़, डूंगरपुर, भीलवाडा मांय ई आम्बेड़कर जयंती रे मौके श्रद्धाजंलि सभा समेत न्यारा-न्यारा कार्यक्रम आयोजित व्ह्या।