रोशनी रा त्यौहार दीवाळी रा दीपोत्सव रे तैत शुक्रवार ने कुछ ठोडां दीवाळी मनाई जावे। ई बार अमावस्या री तिथ दो दिन रहेवण रे कारण ओ व्हे रियो है। वठे ई केई ठोडां गोवर्धन अर अन्नकूट महोत्सव राखी ज्या है। कार्तिक अमावस्या रे दूजे दिन गोवर्धन पूजा करी जावे। गाय रा गोबर ऊं गोवर्धन बणा र फूल अर दीया जगार पूजन करयो जावे। उठी ने मिन्दरां मांय अन्नकूट बणा र प्रसादी बांटी जाय री है। पुष्टी मार्गीय प्रधान पीठ राजसमंद रा नाथद्वारा रा श्रीनाथजी मिन्दर मांय आज रीत मुजब अन्नकूट उत्सव मनायो जावे। वागड़ हलका रा बेणेश्वर धाम माथे श्रद्धालुआं री घणी भीड़ है। म्हारा डूंगरपुर खबरनवीस बतायो के सोम, माही अर जाखम नदियां रा संगम थळ माथे आज घणी तादाद मांय लोग पवित्र डुबकी लगाई।
चूरू रा नामी सालासर बालाजी मिन्दर मांय ई देश रा कोंणा-कोंणा ऊं श्रद्धालु पूग्या है। म्हारा खबरनवीस बतायो के संवारा ऊं ई दर्शानणियां री भीड़ देखी जावे। उठी ने ब्रज हलका रा भरतपुर मांय घणकरी ठोडां गोवर्धन पूजा काले करी जाएला। राजधानी जयपुर रा गोविन्ददेव जी समेत दूजा मिन्दरां मायं होवण वाळा अन्नकूट महोत्सव माथे सजायी जावण वाळी छप्पनभोग झांकी री तैयारियां जोर-शोर ऊं करी जावे। उदयपुर रा महालक्ष्मी मिन्दर मांय अन्नकूट महोत्सव आज मनायो जावे। वठे ई जगदीश मिन्दर मांय गोवर्धन पूजा अर अन्नकूट रा आयोजन काले व्हेला। सवाईमाधोपुर रा रामेश्वर धाम रा त्रिवेणी संगम माथे घणी तादाद मांय लोग पवित्र स्नान करने दान-पुण्य करयो। प्रदेशभर मांय लोग एक-दूजा ने दीवाळी री बधाई अर शुभकामना दे रिया है। रामा-श्यामा करण रे साथे ई मिठाईयां अर निजरानां ई लिया-दिया जावे। टोंक रा मालपुरा मांय नेहरु युवा केन्द्र अर मानव सेवा समिति कानी ऊं जरूरतमंदां ने नुवा कपड़ा बांटी ज्या।। पुलिसकर्मियां री दीवाळी आज है। काले ड्यूटी माथे तैनात रेहवण रे कारण वे आज ओ तिवांर मना रिया है। टोंक पुलिस अधीक्षक विकास सांगवान पुलिसकर्मियां ने मिठाई बांटने वां रे साथे दीवाळी मनाई। दीवाळी रे साथे ई स्नेह मिलन जळसा रो सिलसिलो ई सरू व्हे ग्यो है। मुख्यमंत्री भजनलाल शर्मा आज जयपुर रा सांगानेर मांय दीवाळी स्नेह मिलन मांय शिरकत करी। ई मौके वणां कयो के उमंग अर उल्लास रो ओ तिवांर एक-दूजा ने जोड़ण रो संदेश देवे है। केंद्रीय कानून मंत्री अर्जुनराम मेघवाल आज बीकानेर मांय बीएसएफ जवानां ने साथे दीवाळी रो तिवांर मनायो। वणा दीप जगार जवानां रो मुंह मीठो करवायो अर खुशी मनाईं।