आखा देश अर प्रदेश मांय गुरूवार ने दीवाळी री श्रद्धा, उमंग अर उमाव छायो है। रोशनी रो ओ त्यौहार धूमधाम रे साथे मनायो जावे । लक्ष्मी गणेश पूजन कर ने सुख समृद्धि अर धन धान्य री कामना करी जावे। लोग आप रा पिरवार , साथियां अर शुभचिंतकां ने आपसी सद्भाव अर समरसता रा ई तिवांर री बधाई अर शुभकामनाएं देवे। न्यारी-न्यारी तरीकां री मिठाईयां अर पकवानां अर आतिशबाज़ी री मार्फत दीवाळी रो आनन्द लियो जा रह्यो है। मिंदरां, बाजारां, कारोबारी ठिकाणा अर घरां ने मोवणी रंग बिरंगी झालरां, एलईडी लाइटां अर दीप मालावां ऊं सजायी ज्या है। घरां माथे लोगां बंधनवार लगा र फूलां, रंगोली अर माण्डणा ऊं ई रीत मुजब सजावट करी है। चारू दिसावां सतरंगी रोशनी अर दीयां री सुनहरी आभा ऊं जगमग है। चौरायां अर रस्ता माथे दीपदान कर्यो जावे। जयपुर रा गोविंद देव जी, सीकर रा खाटूश्यामजी, चूरू रा सालासर बालाजी अर झालावाड़ रा द्वारिकाधीश मिंदर समेत प्रदेश रा खास मिन्दरां मांय संवारां ऊं ई श्रद्धालुआं री आवक बण्योडी है। महालक्ष्मी मिंदरां ने लुभावणा सजायी ज्या है। पाली रा लक्ष्मी माता मिंदर मांय खास आरती कर ने प्रसादी बांटी जावे। उदयपुर रा भटियाणी रा महालक्ष्मी मिंदर मांय माता रो खास सिणगार करी ज्यो है। म्हाणा खबर नवीस बतायो के सैलाणियां री भीड़ ने देखता हिफाजत रा करड़ा बन्दोवस्त करी ज्या है। उठिने, भारत-पाक सरहद माथे जैसलमेर मांय ई दीपोत्सव रो जश्न देखण जोग है। सरहदी चौकियां माथे दीया जगा र आतिशबाजी करी जावे। सीमा प्रहरी साथी जवानां रे साथे दीवाळी री खुशियां बांट रह्या है। सरहदी बाडमेर मांय ई रोशनी रा त्यौहार माथे उमाव अर उमंग रो माहोल है। बालोतरा, सवाईमाधोपुर, कोटा, अजमेर अर भीलवाडा समेत सगळी ठौड़ां रोशनी रो तिवांर हरक उमाव रे साथे मनायो जावे। झालावाड़ रा संत पीपाजी धाम समेत दूजी ठौड़ां माथे दीपावळी पूजन री तैयारियां चाले। राजसमंद रा नाथद्वारा मांय श्रीनाथ जी मंदिर मांय काले गोवर्धन पूजा अर रीत मुजब अन्नकूट उत्सव मनायो जायेला। हर साल कार्तिक मीना री अमावस ने दीवाळी रो तिवांर मनाये जावे। धनतेरस ऊं सरू व्हे र दीपोत्सव री तिवांरी कड़ी भाई दूज तांई चाले है। ई बार अमावस री तिथ दो दिन रहवण ऊं कुछ ठौड़ां काले ईं दीवाळी मनायी जायेला राज्य सरकार काले छुट्टी ऐलाण करी है। तिवांरी मौका माथे दूरदराज ने शहरां अर दूजा राज्यां मांय काम करण वाळा लोगां रे पाछा घरां आवण ऊं रोडवेज माथे घणो दबाव पड्यो है। इण रे अलावा रेलवे टेशणा, बस ठेसणा माथे खासी भीड़ निजर आवे। हवाई सफ़र करण वाळां री तादादी घणी बध ग्यी है। दीपावळी रे मौके कानून वन्दोवस्त अर भाईचारों बणाया राखण सारू पुलिस मुस्तैद है। घणी तादाद मांय पुलिसकर्मी हिफाजती बंदोबस्त रो ज़िम्मो संभाळ्या है।