दीपोत्सव री कड़ी मांय थावर ने देश-प्रदेश मांय घणकरी ठोडां गोवर्धन पूजा अर अन्नकूट रा आयोजन व्हे रिया है। घरां अर मिन्दरां मांय गाय रा गोबर ऊं गोवर्धन पर्वत बणार विधिपूरण पूजन करी ज्यो। राजधानी जयपुर मांय गोविंद देवजी समेत दूजा मिन्दरां मांय अन्नकूट महोत्सव मनायो जावे। आं मांय गोवर्धन पर्वत अर छप्पन भोग री झांकियां सजाई ज्यी है। टोंक जिला रा नामी डिग्गी कल्याण जी मिन्दर मांय खास पूजा अर्चना करने भक्तां ने अन्नकूट प्रसादी बांटी जावे। चूरू जिला रा सालासर बालाजी मिन्दर मांय थावर ने खास आरती करीजी। बृज हलका रा भरतपुर मांय गोवर्धन पूजा ने लेर खास उमाव बण्योडो है। गोवर्धन परिक्रमा सारू ई घणी तादाद मांय श्रद्धालु पूग्या है। प्रदेश रा गांवाई हलका मांय थावर ने केई ठोडां मवेशियां ऊं जुड़ी न्यारी-न्यारी रीतां निभाई ज्यी। बळदां अर पशुधन ने मोहवणा सजार वां री पूजा करीजी। ई मौके पाली मांय बेलां रो सिणगार करने अर दौड़ री होड़ां राख्यी। सांचौर जिला रा डावल गांव मांय ई ऊंट अर घुड़दौड़ रो आयोजन व्ह्यो। इण मांय राज्य रे अलावा गुजरात रा मवेशी पालक ई पूग्या। बांसवाड़ा मांय गायां री दौड व्ही। सवाईमाधोपुर, कोटा, झालावाड अर सिरोही समेत दूजी ठोडां माथे ई महिलावां गोवर्धन री पूजा करने सुख समृद्धि री कामना करी। दीपोत्सव री कड़ी मांय कुछ ठोडां थावर ने भाईदूज रो तिवांर ई मनायो जावे। ई दिन बहनां आपरा भाइयां रे तिलक लगार वां री लाम्बी उमर अर खुशहाली री कामना करे है। कुछ ठोडां भाईदूज काले मनाई जावेला। जैन धर्म रा 24वां तीर्थंकर भगवान महावीर स्वामी रो निर्वाण महोत्सव थावर ने ई मनायो जावे। ई मौके जिनालयां मांय खास पूजा करीजी। सीकर रा दिगम्बर जैन मिन्दर मांय थावर ने निर्वाण महोत्सव रो आयोजन करी ज्यो अर मोक्ष कल्याणक लाडू चढ़ाई ज्यो। दीवाळी रे पछे अबे छठ तिवांर री तैयारियां ई सरू व्हे ग्यी है। श्रीगंगानगर मांय ई सारू नहर किनारे अस्थायी घाट बणाया जावे। पर्व ने देखता नहर री साफ-सफाई रो काम ई करयो जावे। छठ पर्व 5 नवंबर ऊं सरू व्हेर 8 नवंबर तांई चालेला।