थावर ने हिन्दी दिवस मनायी ज्यो। साल 1949 मांय आज ही रा दिन संविधान सभा देवनागरी लिपि मांय हिन्दी ने राजभाषा रा तौर ऊं स्वीकार कीनी ही। ईं मौके नई दिल्ली मांय राजभाषा हीरक जयंती समारोह अर चौथो अखिल भारतीय राजभाषा सम्मेलन राख्यी ज्यो। ईं मौके गृहमंत्री अमित शाह कह्यो के हिंदी भाषा देश ने एक राखण मांय खास काम कीनो है। वे कह्यो के नुवी राष्ट्रीय शिक्षा नीति मांय बच्चां ने मायड़ भाषा मांय सिखावण माथे जोर दियो ज्यो है। थावरहिन्दी दिवस रे मौके प्रदेश मांय ई न्यारी-न्यारी ठौड़ां कार्यक्रम राख्यी ज्या। ईं मौके भाषा अर पुस्तकालय विभाग री ओर ऊं राज्य स्तर रो कार्यक्रम जयपुर रा सवाई मानसिंह मेडिकल कॉलेज मांय राख्यी ज्यो। ईं मौके उप मुख्यमंत्री दिया कुमारी लेखन री दस विधावां मांय हिन्दी सेवा पुरस्कार दीना। वे कह्यो के हिन्दी केवल भाषा या विषय नी है, बल्कि म्हाणी ओळखाण है। दिया कुमारी नौजवानां ऊं सोशल मीडिया माथे ई हिन्दी ने बधावो देवण री अपील कीनी। कार्यक्रम मांय सामाजिक न्याय अर अधिकारिता मंत्री अविनाश गहलोत कह्यो के हिन्दी केवल भाषा नी है बल्कि म्हाणी संस्कृति री धरोहर है। ईं मौके कार्मिक विभाग रा शासन सचिव डॉ. के. के. पाठक कह्यो के भाषा एक बहाव है जो संस्कृति ऊं संस्कार ले र आवे है। ईं मौके हिन्दी रा लेखकां अर राजस्थान बोर्ड री दसवीं अर बारहवीं री परीक्षा मांय हिन्दी मांय सौ फीसदी नम्बर लावण वाळा विद्यार्थियां रो मान करी ज्यो। कार्यक्रम मांय विधायक गोपाल शर्मा ई मौजूद रह्या। केन्द्र अर राज्य सरकार रा न्यारा-न्यारा दफ्तरां मांय थावर ने हिन्दी पखवाड़ो सरू व्ह्यो। जयपुर रा अल्बर्ट हॉल मांय निबंध लेखन अर श्रुत लेख री होड़ां राख्यी ज्यी। बाड़मेर ज़िला री स्कूलां मांय निबंध लेखन, श्रुत लेख अर हस्त लेखन समेत न्यारी-न्यारी होड़ां राख्यी ज्यी। केकड़ी री न्यारी-न्यारी स्कूलां मांय ई निबंध लेखन, कविता पाठ अर भाषण री होड़ां राख्यी ज्यी अर जीतण वाळा विद्यार्थियां ने ईनाम दिया ज्या। केकड़ी रा सरकारी कॉलेज मांय “वर्तमान परिप्रेक्ष्य में हिंदी भाषा का महत्व“ मुद्दा माथे निबंध होड़ राख्यी ज्यी। टोंक मांय विचार गोष्ठी अर निबन्ध लेखन समेत न्यारी-न्यारी होड़ां राख्यी ज्यी। सवाईमाधोपुर जिला मांय राख्यी ज्यी संगोष्ठियां मांय हिंदी ने बत्ती ऊं बत्ती काम लेवण माथे जोर दियो ज्यो। कोटपूतली-बहरोड़ रा लाल बहादुर शास्त्री राजकीय महाविद्यालय मांय सप्ताह भर चालण वाळा कार्यक्रमां री सरूआत करीजी। सांचौर रा स्कूल-कॉलेजां मांय कार्यशाला राख्यी ज्यी अर कविता, नाटक अर निबंध री होड़ां राख्यी ज्यी। झालावाड़ री भवानी नाट््यशाला मांय विचार गोष्ठी राख्यी ज्यी। डूंगरपुर मांय राष्ट्र भाषा हिन्दी के संरक्षण एवं संवर्धन में पत्रकारों की भूमिका मुद्दा माथे विचार गोष्ठी राख्यी ज्यी। भरतपुर रा सरसों अनुसंधान निदेशालय मांय हिंदी पखवाड़ो सरू करी ज्यो। चूरू मांय खास कार्यक्रम राख्यी ज्यो। हनुमानगढ़ जिला रा स्कूल-कॉलेजां मांय ई विश्व हिंदी दिवस मनायी ज्यो।