थावर ने हिन्दी दिवस मणायो जावेला। ईं मौके भाषा अर पुस्तकालय विभाग री ओर ऊं जयपुर रा सवाई मानसिंह मेडिकल कॉलेज मांय राज्य स्तर रो जळसो राख्यो जावेला। जिण मांय उप मुख्यमंत्री दिया कुमारी, सामाजिक न्याय अर अधिकारिता मंत्री अविनाश गहलोत अर विधायक गोपाल शर्मा रो ई सिरकत करण रो कार्यक्रम है। भाषा अर पुस्तकालय विभाग रा निदेशक मनीष गोयल बतायो के ईं साल ऊं हिन्दी सेवा पुरस्कार लेखन री दस विधावां मांय दियो जावेला अर हर विधा मांय 50 हजार रूप्या री रकम ईनाम रा तौर ऊं दी जावेला। जळसा मांय माध्यमिक शिक्षा बोर्ड, राजस्थान री सैकेण्डरी अर सीनियर सैकेण्डरी रा इम्तेहान मांय हिन्दी मांय सौ फीसदी नम्बर लावण वाळा 318 विद्यार्थियां रो मान कर्यो जावेला। श्रीगंगानगर जिला मांय पदमपुर रा एस.एस. आदर्श स्कूल रा दो विद्यार्थियां रो ई राज्य स्तर रा जळसा मांय मान कर्यो जावेला। प्रदेश रा न्यारा-न्यारा जिला मांय ई हिन्दी दिवस रे मौके खास कार्यक्रम राख्या जावेला। हिन्दी दिवस रे मौके राज्यपाल हरिभाऊ बागडे़ जनता ने शुभकामनावां दीनी है। राज्यपाल वां रा संदेश मांय कह्यो के हिन्दी महज भाषा नी है बल्कि भारत री संस्कृति है अर देश रा मान री निशाणी है। वे हिन्दी ने तकनीक ऊं जोड़ र विश्व भाषा बणावण री अपील कीनी।