डॉक्टर हड़ताल
प्रदेश मांय रेजीडेन्ट डॉक्टर अर निजी डॉक्टरां री 24 घंटा री हड़ताल रे पछे आज चिकित्सा सेवावां फैरू बाहल व्हे ग्यी। हालांकि आज भी कुछ सफाखाना मांय डॉक्टर काळी पट्टी बांध र विरोध जताया। कुछ एक ठौड़ां माथे केंडल मार्च अर श्रद्धाजंलि सभावां राखी गयी। दूजी कानी आज बत्ता सफाखाना मांय ओपीडी आईपीडी अर इमरजेंसी समेत सगळी जरूरी सेवावां सरू व्हे ग्यी।चिकित्सा मंत्री गजेन्द्र सिंह खींवसर जयपुर रा सवाईमानसिंह सफाखाना मांय व्यवस्थावां रो जायजो कर्या अर अहलकारां ने जरूरी निर्देश दिया। वणा राजधानी रा दूजा सफाखानां रो दौरो कर चिकित्सा सेवावां रो जायजो कर्यो। चिकित्सा मंत्री कह्या के व्यवस्थावां ने जारी राखबा खातर जरूरी इन्तजाम कर्या गया है। इण बीच कोलकाता मांय महिला डॉक्टर रे सागे दुष्कर्म अर फेर हत्या रा मामला मांय सीबीआई जांच चाल री है। इंडियन मेडिकल एसोसिएशन इण मामला मांय प्रधानमंत्री नरेन्द्र मोदी सुं दखलअंदाजी करण री मांग करी है जिण सुं स्वास्थ्य कर्मियां री हिफ़ाजत खातर केंद्रीय कानून लायो जा सके।