कोलकाता मांय महिला रेंजीडेन्ट डॉक्टर री हित्या रे खिलाफ आज प्रदेश भर रा सरकारी अर प्राईवेट डॉक्टर काम रा बहिष्कार माथे रह्या। हड़ताल रे कारण इमरजेंसी सेवावां ने छोड ने दूजी सेवावां माथे असर पड़्यो। भरतपुर रा आर.बी.एम. अस्पताल, जनाना अस्पताल समेत न्यारा न्यारा अस्पतालां मांय मेडिकल सेवावां माथे असर पड्यो। बीकानेर रा पी.बी.एम. अस्पताल मांय वरिष्ठ चिकित्सकां री छुट्टी टाल दीरीजी है। अठे सीनियर डॉक्टर बन्दोवस्त संभळ्या है। बालोतरा, डूंगरपुर, झालावाड़, भीलवाड़ा मांय ई डॉक्टरां री हड़ताल रे कारण अस्पताला मांय मरीजां ने परेशानी रो सामनो करणो पड़ रह्यो है। दौसा मांय ओ.पी.डी. सेवावां पूरी तरह ठप री। फेरू ई इमरजेंसी सेवावां चालती री। सवाईमाधोपुर मांय चिकित्सकां दोषियां री गिरफ्तारी री मांग ने ले र ज़िला कलेक्टर ने मांग पानो सूप्यो। चित्तौडगढ मांय डॉक्टरां अर नर्सिंग कर्मियां काळी पट्टी बांध ने विरोध जतायो। श्रीगंगानगर मांय प्रशासन कानी ऊं हड़ताल ने देखता जरूरत होवण माथे ऑन कॉल डॉक्टर बुलावण अर यूटीबी अर पीएचसी ऊं डॉक्टर बुलावण रा निर्देश काडी ज्या। डॉक्टरां री देश भर मांय काम बहिष्कार ने ले राज्य मांय स्वास्थ्य सेवावां सुचारू राखण सारू चिकित्सा अर स्वास्थ्य मेहकमां कानी ऊं चाईजता बन्दोवस्त तैय करी ज्या है। चिकित्सा अर स्वास्थ्य मंत्री गजेन्द्र सिंह खींवसर कह्यो के प्रदेशभर मांय स्वास्थ्य सेवावां बणायी राखण सारू वैकल्पिक इन्तजाम करी ज्या है। चिकित्सा मेहकमा री अतिरिक्त मुख्य सचिव शुभ्रा सिंह बतायो के सगळा ज़िला अस्पताला अर दूजा चिकित्सा संस्थानां मांय आई.पी.डी अर इमरजेंसी सेवावां चलायी ज्यी। कुछ ज़िला मांय ओपीडी सेवावां ई सुचारू री।